آڈٹ رپورٹ: نمل کے 16 بینک اکاؤنٹس میں 1.04 ارب روپے، فنانس ڈویژن کی منظوری نہیں

آڈیٹر جنرل آف پاکستان کی 2025-26 کی آڈٹ رپورٹ کے مطابق نیشنل یونیورسٹی آف ماڈرن لینگویجز (نمل) کے 16 بینک اکاؤنٹس میں 30 جون 2024 تک 1,039,656,124 روپے موجود تھے اور یہ اکاؤنٹس فنانس ڈویژن کی منظوری کے بغیر کھولے گئے۔

رپورٹ کے مطابق ان اکاؤنٹس میں طلبہ کی فیس، وظائف، لائبریری، سکیورٹی، پنشن، جنرل پروویڈنٹ فنڈ، ملازمین کے ایڈوانس اور طالبات کی رہائش سے متعلق رقم رکھی گئی تھی۔ سب سے بڑا بیلنس 268.58 ملین روپے فنکشنل کورسز کی فیس کے اکاؤنٹ میں تھا۔ پنشن فنڈ میں 233.76 ملین روپے، جنرل پروویڈنٹ فنڈ میں 112.47 ملین روپے اور ایم فل و پی ایچ ڈی فیس کے الگ اکاؤنٹ میں 97.63 ملین روپے موجود تھے۔

آڈٹ کے مطابق یہ اکاؤنٹس ٹریژری سنگل اکاؤنٹ سسٹم کے تحت نہیں چلائے جا رہے تھے، جو سرکاری رقوم کے مرکزی کیش مینجمنٹ کا نظام ہے۔ کیش مینجمنٹ اینڈ ٹریژری سنگل اکاؤنٹس رولز 2024 کے تحت موجودہ بینک اکاؤنٹس کا جائزہ فنانس ڈویژن اور متعلقہ محکمہ مشترکہ طور پر لینا تھا، غیر ضروری اکاؤنٹس بند کر کے رقم مقررہ طریقہ کار کے مطابق فیڈرل کنسالڈیٹڈ فنڈ یا پبلک اکاؤنٹ میں منتقل کی جانی تھی۔

یونیورسٹی انتظامیہ نے مؤقف اختیار کیا کہ نمل 2000 کے صدارتی آرڈیننس کے تحت قائم خودمختار ادارہ ہے جو اپنے تعلیمی و انتظامی امور خود چلاتا ہے۔ آڈیٹرز نے یہ دلیل مسترد کر دی اور کہا کہ نمل کو فنانس ڈویژن کے 31 جنوری 2023 کے نوٹیفکیشن کے تحت ٹریژری سنگل اکاؤنٹ سسٹم میں شامل کیا گیا تھا۔ آڈٹ نے اسے پبلک فنانس کے قواعد کی خلاف ورزی، غیر قاعدہ اور ناقابل جواز قرار دیا اور سفارش کی کہ تمام کمرشل بینک اکاؤنٹس منظور کیے جائیں یا بند کر کے رقوم ٹریژری سنگل اکاؤنٹ میں منتقل کی جائیں۔

دوسری دریافت کے مطابق مالی سال 2024-25 میں کنٹریکٹ پر تعینات چھ ریٹائرڈ اہلکاروں کو 7,106,800 روپے زائد تنخواہیں ادا کی گئیں۔ یونیورسٹی میں مستقل ملازمین کے لیے منظور شدہ بیسک پے سکیل اور کنٹریکٹ ملازمین کے لیے الگ پے سٹرکچر ہے، تاہم آڈیٹرز نے پایا کہ ان چھ افراد کی تنخواہیں ملٹری ویلفیئر اینڈ ری ہیبیلیٹیشن ڈائریکٹوریٹ کے جاری کردہ پے پیکج کے مطابق مقرر کی گئیں، جو ڈیفنس اداروں میں دوبارہ تعینات ریٹائرڈ اہلکاروں کے لیے تھا اور ایچ ای سی سے فنڈڈ سویلین پبلک یونیورسٹی کے ملازمین پر لاگو نہیں ہوتا۔

ان چھ افراد میں ڈائریکٹر ایڈمنسٹریشن، ڈائریکٹر ہیومن ریسورس، ڈائریکٹر ریجنل سروسز، ایڈیشنل ڈائریکٹر پلاننگ اینڈ انفراسٹرکچر، اسٹاف آفیسر اور مینجمنٹ ٹرینی آفیسر شامل تھے۔ ڈائریکٹر ایڈمنسٹریشن اور ڈائریکٹر ہیومن ریسورس کو آٹھ ماہ میں 1.60 ملین روپے اضافی ملے۔ ڈائریکٹر ریجنل سروسز، ایڈیشنل ڈائریکٹر پلاننگ اینڈ انفراسٹرکچر اور اسٹاف آفیسر کو 934,656 روپے جبکہ مینجمنٹ ٹرینی آفیسر کو 1.08 ملین روپے زائد ادا کیے گئے۔

آڈٹ نے فوجی پے پیکج کے استعمال کو غیر قاعدہ اور غیر مجاز قرار دیا۔ رپورٹ کے مطابق معاملہ 16 اکتوبر 2025 کو انتظامیہ کو بھیجا گیا مگر رپورٹ حتمی ہونے تک کوئی جواب موصول نہیں ہوا، اور آڈٹ نے 7.1 ملین روپے کی وصولی اور آئندہ تعیناتیوں میں منظور شدہ پے سٹرکچر کی پاسداری کی سفارش کی۔

رپورٹ میں یکم اکتوبر 2023 کو ایک بریگیڈیئر کی بطور ڈائریکٹر جنرل اور پرو ریکٹر تعیناتی پر بھی سوال اٹھایا گیا۔ نمل آرڈیننس 2000 کی دفعہ 11 کے مطابق ڈائریکٹر جنرل آرمی ایجوکیشن کور سے تعلق رکھنے والا زبان کا ماہر بریگیڈیئر ہوگا اور اس کی تعیناتی بورڈ کے چیئرمین کریں گے۔ آڈٹ کے مطابق تعینات افسر بلوچ رجمنٹ، جو پیادہ رجمنٹ ہے، سے تعلق رکھتا تھا، اس لیے یہ تعیناتی یونیورسٹی کے قانون کے مطابق نہیں تھی۔ آڈٹ نے بورڈ آف گورنرز کو اس کا جائزہ لینے کی سفارش کی۔ معاملہ 5 نومبر 2025 کو انتظامیہ کو بھیجا گیا اور رپورٹ حتمی ہونے تک کوئی جواب نہیں آیا۔

آڈیٹر جنرل نے سفارش کی کہ آئندہ تمام تعیناتیاں نمل آرڈیننس کے مطابق کی جائیں۔