این اے 77: عطا اللہ تارڑ کو ضابطہ اخلاق کی خلاف ورزی پر طلب کر لیا گیا

الیکشن کمیشن آف پاکستان نے قومی اسمبلی کے حلقہ این اے 77 گوجرانوالہ میں ضمنی انتخاب کے دوران انتخابی ضابطہ اخلاق کی مبینہ خلاف ورزی پر وفاقی وزیر اطلاعات و نشریات عطا اللہ تارڑ کو نوٹس جاری کرتے ہوئے 8 نومبر کو صبح 11 بجے ذاتی حیثیت میں طلب کر لیا ہے۔ اسی دن حلقے میں پولنگ ہوگی۔

صوبائی الیکشن کمشنر پنجاب لاہور کے دفتر سے جاری بیان کے مطابق یہ نوٹس ڈسٹرکٹ مانیٹرنگ افسر نے جاری کیا۔

ترجمان صوبائی الیکشن کمیشن کے مطابق عطا اللہ تارڑ نے مسلم لیگ (ن) کے امیدوار راشد بشیر ورک کی انتخابی مہم میں شرکت کی۔ وفاقی وزرا کا انتخابی مہم میں شامل ہونا ضابطہ اخلاق کے پیرا 18 اور 41 کی خلاف ورزی ہے۔

ترجمان نے بتایا کہ انتخابی مہم پر پابندی کے دوران شرکت پر الیکشنز ایکٹ 2017 کے سیکشن 182 کے تحت بھی نوٹس جاری کیا گیا ہے۔ اس قانون کے تحت مہم کے اختتام سے پولنگ ختم ہونے کے بعد آدھی رات تک 48 گھنٹوں کے دوران حلقے میں عوامی اجتماع منعقد کرنا، اجتماع یا جلوس میں شرکت کرنا ممنوع ہے۔ الیکشن کمیشن نے این اے 77 اور پی پی 203 ساہیوال میں مہم 6 اور 7 نومبر کی درمیانی شب تک ختم کرنے کی ہدایت کی تھی۔

ترجمان کے مطابق عدم پیشی کی صورت میں دستیاب ریکارڈ کی بنیاد پر یکطرفہ کارروائی کی جائے گی۔

آج نیوز کے مطابق الیکشن کمیشن نے میڈیا رپورٹس کا نوٹس لیتے ہوئے ڈسٹرکٹ مانیٹرنگ افسر اور ڈسٹرکٹ ریٹرننگ افسر سے عطا اللہ تارڑ کے ہیلی کاپٹر کے ذریعے حلقے کے دورے اور ایک اجتماع میں شرکت کے حوالے سے رپورٹ بھی طلب کر لی ہے۔ آج نیوز نے بتایا کہ کمیشن کے مطابق تحقیقات اور حتمی فیصلے تک این اے 77 کا نتیجہ روکا جا سکتا ہے۔

قانون کی خلاف ورزی پر دو سال تک قید، ایک لاکھ روپے تک جرمانہ یا دونوں سزائیں دی جا سکتی ہیں۔

یہ نشست مسلم لیگ (ن) کے رکن قومی اسمبلی چوہدری محمود بشیر ورک کے انتقال کے باعث خالی ہوئی تھی۔ ضمنی انتخاب میں 11 امیدوار حصہ لے رہے ہیں، جن میں مسلم لیگ (ن) کے راشد بشیر ورک، پاکستان مرکزی مسلم لیگ کے قاضی ابراہیم گجر، پاکستان نظریاتی پارٹی کے طیب محمود اور آزاد امیدوار شامل ہیں۔

حلقے میں رجسٹرڈ ووٹروں کی مجموعی تعداد 5 لاکھ 18 ہزار 620 ہے، جن میں 2 لاکھ 77 ہزار 480 مرد اور 2 لاکھ 41 ہزار 140 خواتین ووٹرز ہیں۔