عمران خان رات گئے پمز ہسپتال منتقل، تین بج کر 25 منٹ پر اڈیالہ واپس

سابق وزیرِاعظم عمران خان کو منگل اور بدھ کی درمیانی شب اڈیالہ جیل سے اسلام آباد کے پاکستان انسٹیٹیوٹ آف میڈیکل سائنسز (پمز) منتقل کیا گیا، جہاں خصوصی طبی ٹیم نے ان کا معائنہ کیا۔ یہ چار دنوں میں ان کا دوسرا طبی معائنہ تھا اور جیل حکام کے مطابق وہ تین بج کر 25 منٹ پر واپس اڈیالہ پہنچ گئے۔

جیل حکام نے بتایا کہ عمران خان کو سخت سکیورٹی میں ہسپتال منتقل کیا گیا۔ پمز کے ایک اہلکار نے بی بی سی اردو کو بتایا کہ معائنہ ہسپتال میں پہلے سے موجود خصوصی طبی ٹیم نے کیا، جس میں بلڈ پریشر اور بخار چیک کیا گیا، آنکھوں کا معائنہ کیا گیا اور دیگر ضروری ٹیسٹ کیے گئے۔ اہلکار کے مطابق انہیں ہسپتال میں ضروری طبی امداد بھی فراہم کی گئی اور تقریباً ڈیڑھ گھنٹے بعد واپس جیل بھیج دیا گیا۔

جیل حکام کے مطابق عمران خان ایک بج کر 40 منٹ پر اڈیالہ جیل سے روانہ کیے گئے اور تین بج کر 25 منٹ پر واپس پہنچے۔

جیل حکام کا کہنا ہے کہ عمران خان کے معائنے کے لیے بنائی گئی خصوصی طبی ٹیم بدھ کے روز ان کی صحت سے متعلق رپورٹ جاری کر سکتی ہے۔ ٹیسٹوں کے نتائج ابھی سامنے نہیں آئے۔

اس سے قبل آٹھ نومبر کو بھی ان کا جیل کے اندر طبی معائنہ کیا گیا تھا۔

رات گئے ہسپتال منتقلی ایسے وقت میں ہوئی جب 190 ملین پاؤنڈ ریفرنس میں اپیلوں کی سماعت کے دوران عمران خان کے وکیل سلمان صفدر نے عدالت کو بتایا کہ ان کے موکل کا بلڈ پریشر قابو میں نہیں آ رہا۔ ان کے بقول عمران خان نے جیل میں ملاقات کے دوران انہیں بتایا تھا کہ بلڈ پریشر کے باعث انہیں برین ہیمرج کا خطرہ ہے۔

ادھر اسلام آباد ہائی کورٹ نے اڈیالہ جیل حکام کو ہدایت دی ہے کہ وہ بدھ کے روز سلمان صفدر اور سردار لطیف کھوسہ کو عمران خان اور ان کی اہلیہ بشریٰ بی بی سے ایک گھنٹے کی ملاقات کرائیں۔