نیپالی کوہ پیما کا کے ٹو فلم میں اپنی ٹیم کی فوٹیج استعمال کرنے پر اعتراض

جنوری 2021 میں کے ٹو کی پہلی سرمائی چڑھائی مکمل کرنے والی نیپالی ٹیم کے رکن منگما ڈیوڈ شیرپا نے ایپل ٹی وی پر نشر ہونے والی دستاویزی فلم The Last First: Winter K2 پر اپنی ٹیم کی تصاویر اور ویڈیو بغیر اجازت استعمال کرنے کا الزام لگایا ہے۔ وہ اب پارلیمنٹ کے رکن ہیں۔ ان کا کہنا ہے کہ فلم میں نیپالی کوہ پیماؤں کو مناسب پذیرائی نہیں دی گئی۔

فلم میں علی سعدپارہ اور جان سنوری کی سرمائی کوشش کے ساتھ اس نیپالی مہم کا ذکر بھی ہے جس نے جنوری 2021 میں دنیا کی دوسری بلند ترین چوٹی کی پہلی سرمائی چڑھائی مکمل کی۔ اس ٹیم میں نرمل پوریا المعروف نمسدائی بھی شامل تھے۔ منگما ڈیوڈ شیرپا خود اس چڑھائی کا حصہ تھے۔

فرانسیسی کوہ پیمائی کی ویب سائٹ آلٹیٹیوڈ کے مطابق انہوں نے فلم کی narration اور سب ٹائٹلز کے ترجمے کے بعض حصوں پر بھی اعتراض کیا اور یہ سوال اٹھایا کہ ان کی ٹیم کی فوٹیج اور ویڈیو کلپس فلم میں کیسے آئے۔ انہوں نے پروڈکشن کمپنی اور ایپل ٹی وی سے مطالبہ کیا ہے کہ وہ بتائیں کہ یہ مواد کہاں سے لیا گیا، کون سی اجازتیں حاصل کی گئیں اور تجارتی استعمال کی شرائط کیا تھیں۔

آلٹیٹیوڈ کے مطابق فلم نے مہم کے اخلاقیات پر بحث بھی چھیڑ دی ہے، جن میں مختلف ٹیموں کی جانب سے پہاڑ پر لگائی گئی فکسڈ رسیاں شامل ہیں۔

منگما ڈیوڈ شیرپا نے کہا کہ بین الاقوامی پروڈکشنز میں ہمالیائی گائیڈز اور شیرپاؤں کے ساتھ سلوک درست نہیں، نیپالی کوہ پیماؤں کو کئی دہائیوں سے مناسب پذیرائی نہیں ملی اور غیر ملکی فلم ساز بعض اوقات ان کا استحصال کرتے ہیں۔ انہوں نے اس رویے کو نوآبادیاتی قرار دیتے ہوئے زیادہ انصاف، احترام اور شفافیت کا مطالبہ کیا۔

آلٹیٹیوڈ کے مطابق انہوں نے کہا: ”کے ٹو کی تاریخی سرمائی مہم کو دستاویزی شکل دینا اہم ہے، لیکن جنہوں نے یہ تاریخ رقم کی ان کے حقوق اور وقار کا احترام بھی اتنا ہی اہم ہے۔“

ان کا کہنا تھا کہ بڑی چڑھائیوں کی کہانی سناتے ہوئے ان لوگوں کو نقصان نہیں پہنچانا چاہیے جنہوں نے یہ کارنامے انجام دیے اور انہیں ریکارڈ کیا۔ انہیں امید ہے کہ پروڈکشن کمپنی اور ایپل ٹی وی تصاویر کے حقوق اور متعلقہ کوہ پیماؤں کی رضامندی سے متعلق سوالات کا جواب دیں گے۔