شہباز شریف: قرضوں کی ادائیگی ترقی پذیر ممالک کی ترقی کیلئے رکاوٹ ہے

وزیراعظم شہباز شریف نے اقوام متحدہ کے صدر دفتر میں ترقی کے حق سے متعلق اعلامیے کے اجلاس سے خطاب کرتے ہوئے کہا کہ قرضوں کی ادائیگی ترقی پذیر ممالک کی مالی گنجائش کو محدود کر رہی ہے جس سے حکومتوں کے لیے ترقی اور عوام کی زندگی بہتر بنانے کے وسائل کم ہو رہے ہیں۔

انہوں نے کہا کہ ترقی کا مقصد صرف دولت پیدا کرنا نہیں ہونا چاہیے بلکہ اس سے سماجی بہتری اور انسانی وقار کا تحفظ بھی ہونا چاہیے۔

وزیراعظم نے کہا کہ تقریباً چار عشروں قبل منظور ہونے والے اعلامیے میں ترقی کو ہر فرد کا ناقابل تنسیخ حق قرار دیا گیا تھا۔ انہوں نے کہا کہ بڑھتے ہوئے عالمی چیلنجوں کے باوجود اس کا پیغام آج بھی اتنا ہی اہم ہے۔

شہباز شریف نے کہا کہ ہر فرد بہتر مستقبل کا حق رکھتا ہے اور ترقی کو مواقع پیدا کرنے کے ساتھ ساتھ انسانی وقار اور بنیادی حقوق کا تحفظ بھی یقینی بنانا چاہیے۔

انہوں نے موسمیاتی آفات کو ترقی کے حصول کے لیے بڑا خطرہ قرار دیا اور کہا کہ ایک قدرتی آفت برسوں کی محنت سے حاصل ہونے والی پیش رفت کو ختم کر سکتی ہے اور ترقی پذیر ممالک پر اضافی بوجھ ڈال سکتی ہے۔ انہوں نے کمزور ممالک کی مدد کے لیے بین الاقوامی کوششیں تیز کرنے پر زور دیا۔

دوسری جانب اے آر وائی نیوز نے اقتصادی امور ڈویژن کی ماہانہ رپورٹ کے حوالے سے بتایا کہ رواں مالی سال کے پہلے دو مہینوں میں پاکستان کو 1.70 ارب ڈالر کے بیرونی قرضے ملے جو گزشتہ مالی سال کی اسی مدت کے 1.37 ارب ڈالر کے مقابلے میں 23.60 فیصد زیادہ ہیں۔ روپے میں یہ رقم 476 ارب روپے بنتی ہے جبکہ گزشتہ سال 391 ارب روپے تھی۔

اس میں سے 484.5 ملین ڈالر مختلف منصوبوں کے لیے جبکہ 1.21 ارب ڈالر غیر منصوبہ جاتی فنانسنگ کے طور پر حاصل کیے گئے۔ بین الاقوامی مالیاتی اداروں نے پہلے دو مہینوں میں 590 ملین ڈالر سے زائد قرضے فراہم کیے جن میں اسلامی ترقیاتی بینک 191.2 ملین، عالمی بینک 238.4 ملین اور ایشیائی ترقیاتی بینک 95.7 ملین ڈالر شامل ہیں۔ پاکستان کو مختلف ممالک سے 35.2 ملین ڈالر بھی ملے جن میں جرمنی سے 12.8 ملین اور سعودی عرب سے 8.9 ملین ڈالر شامل ہیں۔ رپورٹ کے مطابق نیا پاکستان سرٹیفکیٹ پروگرام کے تحت 629.7 ملین ڈالر حاصل کیے گئے جبکہ غیر ملکی تجارتی بینکوں سے 300 ملین ڈالر قرض لیا گیا۔