پنجاب: قائمہ کمیٹی اوقاف نے قرآن پرنٹنگ اینڈ ریکارڈنگ ترمیمی بل 2026 منظور کر لیا

پنجاب اسمبلی کی قائمہ کمیٹی برائے اوقاف نے پنجاب ہولی قرآن پرنٹنگ اینڈ ریکارڈنگ ترمیمی بل 2026 کی منظوری دے دی ہے۔ بل کا مقصد قرآن پاک کی طباعت، اشاعت اور ریکارڈنگ کو غلطیوں سے پاک بنانا اور مقدس کتاب کی بے حرمتی، تحریف، تبدیلی، آلودگی یا توہین پر کارروائی کا طریقہ کار متعین کرنا ہے۔

فاروق خان مانیکا کی صدارت میں منعقدہ اجلاس میں بل متفقہ طور پر منظور کیا گیا۔ ایکسپریس نیوز کی رپورٹ کے مطابق رانا محمد ارشد نے کہا کہ قانون میں یہ ترامیم قرآن پاک کی طباعت، اشاعت اور ریکارڈنگ کو غلطیوں سے پاک کرنے کے لیے منظور کی گئی ہیں۔

بل کے متن کے مطابق قابل اعتراض تحریر، نشان، تصویر یا دیگر مواد سامنے آنے پر تفتیشی پولیس افسر کو فوری قبضے کا اختیار ہو گا اور قبضے کے بعد یہ مواد متعلقہ مجسٹریٹ کے سامنے پیش کرنا لازم ہو گا۔ مجسٹریٹ کی ہدایت پر شواہد پنجاب فرانزک سائنس اتھارٹی یا حکومت کی نامزد کردہ فرانزک لیبارٹری میں محفوظ کیے جائیں گے۔ شواہد محفوظ ہونے کے بعد اصل مواد پنجاب قرآن بورڈ کے حوالے کیا جائے گا، اور اس کی محفوظ تحویل، بحالی، صفائی یا تلفی بورڈ سے مشاورت کے بعد مقررہ طریقہ کار کے تحت ہو گی۔

کمیٹی نے کسی شخص یا جاندار کے جسم پر قابل اعتراض تحریر، نشان، ٹیٹو، پینٹنگ یا تصویر کی صورت میں کارروائی کی تجویز بھی منظور کی۔ متن کے تحت جسم پر موجود مواد ہٹانے سے پہلے تصاویر اور ویڈیو کے ذریعے شواہد محفوظ کرنا لازم ہو گا، متعلقہ شخص کو اپنا مؤقف پیش کرنے کا موقع دیا جائے گا اور مجسٹریٹ کے حکم پر ہی یہ مواد ہٹایا جائے گا۔

سوشل میڈیا اور ڈیجیٹل پلیٹ فارمز پر غیر قانونی مواد کی روک تھام کے لیے معاملہ پی ٹی اے یا متعلقہ ادارے کو بھیجنے کی تجویز بھی منظور کی گئی، جس کے تحت غیر قانونی مواد ہٹانے، بلاک کرنے یا اس تک رسائی بند کرنے کا اختیار دیا جائے گا۔

اجلاس میں قرآن بورڈ کے خصوصی سیل میں غیر سرکاری ارکان کے ساتھ وزیراعلیٰ کی جانب سے مقرر کردہ سرکاری ارکان شامل کرنے کی تجویز منظور کی گئی۔ متن کے مطابق خصوصی سیل کے غیر سرکاری ارکان وزیراعلیٰ کی صوابدید پر خدمات انجام دیں گے۔

بل کے متن میں قرآن پاک اور مقدس شخصیات کے خلاف سوشل میڈیا پر توہین آمیز مواد سے مذہبی بے چینی اور بدامنی پیدا ہونے کے خدشات کا حوالہ دیتے ہوئے قانون سازی کو ضروری قرار دیا گیا ہے، اور فرانزک تحقیقات کے ذریعے شواہد محفوظ کر کے قانونی کارروائی کا نظام قائم کرنے کی تجویز دی گئی ہے۔

بل کو اب صوبائی اسمبلی سے منظوری کے بعد گورنر پنجاب کی حتمی منظوری کے لیے بھیجا جائے گا۔