ریلوے آمدن 115 ارب روپے تک پہنچ گئی، 160 ارب کا ہدف: حنیف عباسی

وفاقی وزیر ریلوے حنیف عباسی نے پیر کو راولپنڈی ریلوے اسٹیشن پر کہا کہ پاکستان ریلوے کی آمدن 88 ارب روپے سے بڑھ کر 115 ارب روپے تک پہنچ چکی ہے اور رواں سال اسے 160 ارب روپے تک لے جانے کا ہدف رکھا گیا ہے۔ وہ عوام ایکسپریس میں 11 نئی بوگیوں کی شمولیت کی تقریب سے خطاب کر رہے تھے۔

انہوں نے کہا کہ ریلوے کے مسائل کے حل کے لیے 31 دسمبر کی ڈیڈ لائن مقرر کی گئی ہے، اس دوران چھٹیاں بند رہیں گی اور تمام افسران اور عملہ فیلڈ میں موجود رہے گا۔

عوام ایکسپریس کو نجکاری کے عمل میں اے اے انٹرپرائزز نے حاصل کیا ہے۔ وزیر نے کمپنی کو مبارکباد دی اور کہا کہ ٹرین پہلے ایسی حالت میں تھی کہ اسے دیکھنے کو دل نہیں چاہتا تھا، اب اس کی مکمل تزئین و آرائش کر دی گئی ہے۔ ان کا کہنا تھا کہ اس ٹرین کو کامیاب بنایا جائے گا اور اسے ناکام کرنے کی کوششیں کامیاب نہیں ہوں گی۔

حنیف عباسی نے بتایا کہ لاہور ریلوے ورکشاپ جو 15 سال سے بند تھی بحال کر دی گئی ہے اور 2008 سے بند انجن اور پہیے کی مرمت کرنے والی پانچ ورکشاپس دوبارہ فعال کر دی گئی ہیں۔

انہوں نے یہ بھی بتایا کہ ریلوے کی 40 ٹرینوں میں سے 20 میں مکمل بریکیں موجود نہیں ہیں، تاہم 31 دسمبر تک ریلوے کے مسائل حل کرنے کی کوشش کی جائے گی۔

وزیر نے کہا کہ ریلوے ملازمین کی تنخواہیں باقاعدہ کر دی گئی ہیں، صفائی کا نظام اپ گریڈ کیا جا رہا ہے اور 60 اسٹیشنوں پر مفت وائی فائی کی سہولت دی گئی ہے۔ اسٹیشنوں کے تمام حصوں کی نگرانی سی سی ٹی وی کیمروں سے کی جا رہی ہے اور ریلوے کے پرزے چرانے والوں کے خلاف سخت کارروائی ہوگی۔

ان کا کہنا تھا کہ پنجاب حکومت نے ریلوے کے لیے 10 ارب روپے کا پیکج دیا ہے، جس پر وہ وزیراعلیٰ مریم نواز کے شکر گزار ہیں، جبکہ خیبرپختونخوا حکومت کے ساتھ بھی تعاون کا معاہدہ ہو چکا ہے۔ لاہور اور راولپنڈی ریلوے اسٹیشنوں کو وکٹورین طرز پر بحال کرنے کے لیے پنجاب حکومت نے فنڈز جاری کر دیے ہیں اور روہڑی جنکشن کو بھی بہتر بنایا گیا ہے۔

حنیف عباسی نے کہا کہ ریلوے اسپتال نجی شعبے کے حوالے کیا جا رہا ہے تاہم ملازمین کو علاج کی مکمل مفت سہولت دی جائے گی۔ ایم ایل ون منصوبہ عالمی بینک اور ایشیائی ترقیاتی بینک کے تعاون سے مکمل کیا جائے گا، جبکہ تھر کول منصوبے کا افتتاح وزیراعظم کریں گے۔

انہوں نے کہا کہ نیشنل لاجسٹکس سیل ریلوے کی بھرپور مدد کر رہا ہے اور اگر این ایل سی اپنے انجن واپس لے لے تو ریلوے کا نظام بری طرح متاثر ہو سکتا ہے۔