چھوٹے ہتھیاروں پر عبور بنیادی فوجی تربیت کا لازمی حصہ ہونا چاہیے: فیلڈ مارشل منیر

چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر نے کہا ہے کہ چھوٹے ہتھیاروں پر عبور حاصل کرنا بنیادی فوجی تربیت کا لازمی جزو ہونا چاہیے۔

انہوں نے یہ بات جہلم میں آرمی مارکس مین شپ یونٹ میں پاکستان آرمی رائفل ایسوسی ایشن کی 46 ویں سینٹرل میٹ کی اختتامی تقریب میں کہی۔ انٹر سروسز پبلک ریلیشنز (آئی ایس پی آر) کے مطابق فیلڈ مارشل عاصم منیر تقریب کے مہمان خصوصی تھے جبکہ چیف آف نیول اسٹاف ایڈمرل نوید اشرف بطور مہمان اعزاز شریک ہوئے۔

آئی ایس پی آر کے مطابق یہ مقابلے 7 اکتوبر سے 11 نومبر تک جاری رہے، جن میں پاک فوج، پاک بحریہ، پاک فضائیہ اور سول آرمڈ فورسز کے 1500 سے زائد نشانہ بازوں نے حصہ لیا۔ آج نیوز کی رپورٹ کے مطابق شرکا میں سندھ اور پنجاب رینجرز اور گلگت بلتستان اسکاؤٹس کے علاوہ پنجاب، خیبرپختونخوا، بلوچستان، فیڈرل رائفل ایسوسی ایشن اور سویلین ٹیموں کے نشانہ باز بھی شامل تھے۔

چوتھی انٹر سروسز کومبیٹ شوٹنگ چیمپئن شپ کی ٹرافی پاکستان آرمی نے جیتی، جبکہ پاکستان آرمی کے آرمی مارکس مین شپ یونٹ نے پرائم منسٹر اسکلز ایٹ آرمز بگ بور نیشنل چیلنج میچ اپنے نام کیا۔

شوٹنگ کا اعلیٰ ترین فوجی اعزاز ماسٹر ایٹ آرمز ٹرافی، جسے ڈولی کپ بھی کہا جاتا ہے، پنجاب رجمنٹ کے حوالدار فضل الرحمان نے حاصل کیا۔ پنجاب رجمنٹ نے یونٹ فائرنگ پروفیشنسی میچ اور انفنٹری اسکواڈ میچ بھی جیتا۔

فیلڈ مارشل عاصم منیر اور ایڈمرل نوید اشرف نے مختلف کیٹیگریز میں کامیاب نشانہ بازوں اور رنر اپ کو ٹرافیاں اور تمغے تقسیم کیے۔

شرکا سے گفتگو میں فیلڈ مارشل عاصم منیر نے نشانہ بازوں کی مہارت اور درستگی کو سراہا اور کہا کہ نشانہ بازی میں مہارت ایک پیشہ ور فوجی کی پہچان ہے۔

آئی ایس پی آر کے مطابق آرمی مارکس مین شپ یونٹ پہنچنے پر انسپکٹر جنرل ٹریننگ اینڈ ایویلیوایشن اور کمانڈر راولپنڈی کور نے فیلڈ مارشل کا استقبال کیا۔