سپریم کورٹ کے ریلیف سے ایمان مزاری کی اپیلیں زندہ ہوئیں: پراسیکیوٹر

اسلام آباد ہائی کورٹ میں ایمان مزاری اور ہادی علی چٹھہ کے خلاف متنازع ٹویٹس کیس کی سماعت کے دوران بدھ کو سپیشل پراسیکیوٹر نے کہا کہ سپریم کورٹ کی جانب سے دیے گئے غیر معمولی ریلیف کے بعد ان کی اپیلیں دوبارہ زندہ ہو گئی ہیں۔ وکیل فیصل صدیقی نے اس موقف پر سوال اٹھایا کہ کیا اپیل پہلے مر گئی تھی۔

سپریم کورٹ نے 17 ستمبر کو ایمان مزاری اور ان کے شوہر وکیل ہادی علی چٹھہ کی درخواستیں منظور کرتے ہوئے دونوں کی سزائیں معطل کر دیں اور اسلام آباد ہائی کورٹ کے حتمی فیصلے تک ضمانت پر رہائی کا حکم دیا۔ تاہم اڈیالہ جیل سے رہائی کے چند گھنٹے بعد ہی انہیں ایک الگ مقدمے میں دوبارہ گرفتار کر لیا گیا اور انسداد دہشت گردی کی عدالت نے جوڈیشل ریمانڈ پر اڈیالہ جیل بھیج دیا۔

اسلام آباد کی ڈسٹرکٹ اینڈ سیشن عدالت نے رواں برس 24 جنوری کو ایمان مزاری اور ہادی علی چٹھہ کو سوشل میڈیا پوسٹس کے مقدمے میں پیکا ایکٹ کی دفعات 9، 10 اور 26 اے کے تحت مجموعی طور پر 17، 17 سال قید کی سزا سنائی تھی۔ دونوں نے اس فیصلے کے خلاف اسلام آباد ہائی کورٹ سے رجوع کیا اور سزائیں معطل کرنے کی درخواستیں دائر کیں۔

بدھ کو جسٹس اعظم خان نے کیس کی سماعت شروع کی تو وکیل فیصل صدیقی نے سپریم کورٹ کے حالیہ فیصلے کی روشنی میں درخواستیں نمٹانے کی استدعا کی۔ جسٹس اعظم خان نے کہا کہ اب تو آپ کو ریلیف مل گیا ہے اور پوچھا کہ سپریم کورٹ نے کیا لکھا ہے کہ اپیلیں سن لیں؟ وکیل نے جواب دیا کہ ایسا کچھ نہیں لکھا۔

عدالت نے وکیل کو سپریم کورٹ کا حکم نامہ پڑھنے کی ہدایت کی۔ سپیشل پراسیکیوٹر نے کہا کہ عدالت نے اپنے حکم میں تین چیزیں لکھی ہیں، لیکن فیصل صدیقی نے کہا کہ آپ رہنے دیں، آپ اس وقت چھٹی پر تھے۔ حکم نامہ پڑھنے کے بعد سپیشل پراسیکیوٹر نے کہا کہ سپریم کورٹ کے غیر معمولی ریلیف کے بعد اپیلیں دوبارہ زندہ ہو گئیں۔ فیصل صدیقی نے پوچھا کہ پہلے کیا اپیل مر گئی تھی؟

فریقین کے دلائل سننے کے بعد جسٹس اعظم خان نے کہا کہ ہم آرڈر کریں گے۔ انڈپینڈنٹ اردو کے مطابق ستمبر کے آغاز میں این سی سی آئی اے کے پراسیکیوٹر کی عدم دستیابی کے باعث سماعت آگے نہ بڑھ سکی تھی اور عدالت نے 23 ستمبر تک ملتوی کر دیا تھا۔