ابرار احمد پہلی بار ٹی ٹوئنٹی بولنگ رینکنگ میں نمبر ون

انٹرنیشنل کرکٹ کونسل کی تازہ ترین ٹی ٹوئنٹی بولنگ رینکنگ میں پاکستان کے لیگ اسپنر ابرار احمد پہلی بار نمبر ون بن گئے ہیں۔ ایکسپریس نیوز کے مطابق ابرار احمد ٹی ٹوئنٹی بولنگ رینکنگ میں یہ اعزاز حاصل کرنے والے پاکستان کے پانچویں بولر ہیں۔

ابرار احمد نے افغانستان کے راشد خان کو صرف ایک ریٹنگ پوائنٹ کے فرق سے پیچھے چھوڑا۔ راشد خان پچھلے چھ ماہ سے نمبر ون پوزیشن پر قابض تھے اور اب ایک پوائنٹ کے فرق سے دوسرے نمبر پر چلے گئے ہیں۔

اس سے قبل عمر گل، سعید اجمل، عماد وسیم اور شاہد آفریدی ٹی ٹوئنٹی بولنگ رینکنگ میں نمبر ون رہ چکے ہیں۔ ابرار احمد ان کے بعد یہ مقام پانے والے پہلے پاکستانی بولر ہیں۔

بولنگ رینکنگ میں ہی پاکستان کے محمد نواز آٹھویں پوزیشن پر ہیں جبکہ سلمان مرزا ایک درجہ تنزلی کے بعد انیسویں نمبر پر آ گئے ہیں۔ انگلینڈ کے جیمی اوورٹن نے 47 درجے ترقی کر کے کیریئر کی بہترین چھٹی پوزیشن حاصل کی ہے۔

ٹی ٹوئنٹی بیٹنگ رینکنگ میں پاکستان کے صاحبزادہ فرحان تیسرے نمبر پر موجود ہیں، لیکن ٹاپ 20 میں ان کے علاوہ کوئی پاکستانی بلے باز شامل نہیں ہے۔ انگلینڈ کے کپتان ہیری بروک سری لنکا کے خلاف کامیاب ہوم سیریز کے بعد کیریئر کی بہترین چوتھی پوزیشن پر پہنچ گئے ہیں۔ جوز بٹلر نے سیریز میں 172 رنز بنائے اور وہ بروک سے ایک درجہ پیچھے پانچویں نمبر پر ہیں۔

ون ڈے رینکنگ میں زمبابوے کے کپتان سکندر رضا پانچ درجے ترقی کر کے 24ویں نمبر پر آ گئے ہیں۔