بلاول کا وزیراعظم سے اتحادیوں کا اعتماد بحال کرنے کا مطالبہ

پاکستان پیپلز پارٹی کے چیئرمین بلاول بھٹو زرداری نے منگل کو کراچی میں کہا کہ پارٹی نے سیلاب متاثرین کے لیے 10 لاکھ گھر تعمیر کر دیے ہیں اور منصوبے کی تکمیل تک یہ تعداد 20 لاکھ تک پہنچائی جائے گی۔ انہوں نے وزیراعظم شہباز شریف سے کہا کہ وہ اپوزیشن کے ساتھ نیا محاز کھولنے کے بجائے اتحادیوں کا اعتماد بحال کریں۔

سیلاب متاثرین کو گھروں کی فراہمی کی تقریب سے خطاب کرتے ہوئے انہوں نے کہا کہ یہ دنیا میں گھروں کی تعمیر کا سب سے بڑا منصوبہ ہے اور اس سے پہلے زیادہ گھر بنانے کا ریکارڈ نیپال کی حکومت کے پاس تھا۔ ان کے مطابق منصوبے میں وفاقی حکومت اور عالمی شراکت داروں کی مدد حاصل ہے اور 10 لاکھ خاندانوں کو زمین کی ملکیت دی گئی ہے، جو 1970 کے بعد زمین کی سب سے بڑی منتقلی ہے۔

بلاول بھٹو نے کہا کہ یہ منصوبہ روٹی، کپڑا اور مکان کے وعدے کی تکمیل ہے اور گھر کی ملکیت سے غریب خاندانوں کو معاشی تحفظ ملے گا۔ انہوں نے کہا کہ پیپلز پارٹی نے کسانوں کو بھی مالکانہ حقوق دیے۔

انہوں نے کہا کہ دنیا معاشی بحران سے گزر رہی ہے اور عوام ریلیف کے لیے حکومتوں کی طرف دیکھ رہے ہیں، سندھ حکومت کا ہر منصوبہ عوام کے لیے ہے۔ ان کے بقول لوگ یہ نہیں دیکھ رہے کہ حکومتیں انہیں آپس میں کیسے لڑائیں گی بلکہ یہ دیکھ رہے ہیں کہ بحران میں ان کا ساتھ کیسے دیا جائے گا۔ انہوں نے کہا کہ سیاسی جماعتوں کی ذمہ داری نفرت پھیلانا نہیں بلکہ عوام کو معاشی مشکلات سے نکالنا ہے، اور کچھ سیاستدان یہ سمجھتے ہیں کہ کاروباری طبقے کو مزید امیر بنانے سے ملک ترقی کرے گا۔

چیئرمین پیپلز پارٹی نے وزیراعظم شہباز شریف کا اس منصوبے میں سندھ حکومت کی حمایت پر شکریہ ادا کیا اور کہا کہ شہباز شریف سے پہلے جس وزیراعظم کے دور میں سیلاب آیا، اس وقت ایک روپیہ بھی نہیں دیا گیا۔

انہوں نے کہا کہ ملک کے مسائل کا مقابلہ کرنے کے لیے سیاست کو ری سیٹ کرنا ہوگا۔ ’میں وزیراعظم شہباز شریف سے کہتا ہوں کہ اپنے اتحادیوں کا اعتماد بحال کریں اور اپوزیشن کے ساتھ نئے جھگڑے شروع کرنے کے بجائے اعتماد کی فضا قائم کریں، ہم معاشی بحران سے نمٹنے میں حکومت کا ساتھ دیں گے۔‘

بلاول بھٹو نے مخالفین کو چیلنج کیا کہ وہ گھروں کی تعمیر کے منصوبے میں کرپشن تلاش کریں اور کہا کہ وہ دعوے سے کہتے ہیں کہ اس منصوبے میں کرپشن نہیں ہوئی۔ انہوں نے وزیراعلیٰ سندھ سے کہا کہ وہ عالمی سطح پر کرپشن کی نگرانی کرنے والے اداروں سے منصوبے کے آڈٹ کی درخواست کریں۔

انہوں نے کہا کہ سندھ حکومت پر کرپشن کے الزامات لگائے جاتے ہیں جبکہ لوگ کہتے ہیں کہ سندھ میں تعلیم کا بحران ہے، اور کوئی ان سے پوچھے کہ یہ مسائل کیوں ہیں۔ انہوں نے دوسرے صوبوں سے کہا کہ وہ سندھ سے عوام کی خدمت کرنا سیکھیں۔