بشریٰ بی بی کی بینائی شدید متاثر، سلمان صفدر کا اسلام آباد ہائی کورٹ میں بیان حلفی

اسلام آباد ہائی کورٹ میں 190 ملین پاؤنڈ کیس میں جمع کرائے گئے بیان حلفی میں بیرسٹر سلمان صفدر نے کہا ہے کہ بشریٰ بی بی کی بینائی شدید متاثر ہو چکی ہے اور وہ سیاہ چشمے کے بغیر اپنی آنکھیں نہیں کھول سکتیں۔

ایکسپریس نیوز کے مطابق یہ بیان حلفی اڈیالہ جیل میں بانی پی ٹی آئی عمران خان اور بشریٰ بی بی سے ملاقات کے بعد سامنے آیا۔ بیان میں کہا گیا ہے کہ 31 اکتوبر کو جیل حکام نے اطلاع دی کہ 2 نومبر کو ساڑھے تین بجے ملاقات طے ہے۔ ملاقات شام چار بجے شروع ہوئی اور تقریباً چالیس منٹ جاری رہی۔

سلمان صفدر کے مطابق بشریٰ بی بی نے ملاقات کے دوران غیر معمولی طور پر گہرے سیاہ رنگ کے چشمے پہن رکھے تھے۔ انہوں نے اپنی اور عمران خان کی درخواست پر چشمہ اتارا تو شدید پریشانی میں دکھائی دیں۔ بشریٰ بی بی نے بتایا کہ وہ نہ سورج کی روشنی برداشت کر سکتی ہیں نہ مصنوعی روشنی، اور چشمے کے بغیر آنکھیں بھی نہیں کھول سکتیں۔ سلمان صفدر نے کہا کہ انہیں محسوس ہوا کہ بشریٰ بی بی کی بینائی شدید متاثر ہو چکی ہے، اور عمران خان بھی ان کی بگڑتی ہوئی بینائی پر واضح طور پر پریشان دکھائی دیے۔

بیان حلفی کے مطابق بشریٰ بی بی نے کہا کہ معائنے کے لیے آنے والے ڈاکٹروں نے ان کی بیماری کو مچیور کیٹریکٹ قرار دیا ہے اور 15 نومبر کے قریب ان کی آنکھوں کا ایک اور آپریشن کرنا ہوگا۔

بشریٰ بی بی نے جیل میں صفائی کے معیار اور فراہم کیے جانے والے علاج پر عدم اطمینان کا اظہار کیا اور مطالبہ کیا کہ ان کا معائنہ اور علاج ان کے اپنے ڈاکٹروں سے کروایا جائے۔ سلمان صفدر نے کہا کہ انہوں نے یقین دلایا کہ وہ یہ معاملہ اٹھائیں گے اور عدالت کے نوٹس میں لائیں گے۔

ادھر بشریٰ بی بی نے ایک متفرق درخواست دائر کی ہے جس میں مکمل میڈیکل ریکارڈ عدالت میں پیش کرنے اور فوری طور پر ماہر امراضِ چشم سے معائنے کی استدعا کی گئی ہے۔ درخواست میں کہا گیا ہے کہ ماہر امراضِ چشم اور جیل میڈیکل افسر سے فوری طبی مشاورت کی جائے کیونکہ آنکھوں کی حالت تیزی سے خراب ہو رہی ہے۔ یہ درخواست سلمان صفدر اور خالد یوسف چوہدری کے ذریعے دائر کی گئی۔