دفتر خارجہ: بھارتی شہریوں کے لیے ویزوں کا اجرا بند نہیں کیا گیا

بھارتی شہریوں کو ویزے دینے کا سلسلہ روکا نہیں گیا اور بھارتی پنجاب کے وزیراعلیٰ کے ویزے پر بھی کوئی قدغن نہیں۔ یہ بات دفتر خارجہ کے ترجمان سجاد حیدر خان نے اسلام آباد میں ہفتہ وار پریس بریفنگ کے دوران صحافیوں کو بتائی۔ ان کے مطابق رواں برس 4 ہزار سے زیادہ سکھ زائرین کو پاکستان کے ویزے جاری کیے گئے ہیں۔

شنگھائی تعاون تنظیم کے سربراہی اجلاس کے بارے میں ترجمان نے کہا کہ بھارت کی جانب سے دعوت نامہ موصول ہو چکا ہے۔ یہ اجلاس 20 سے 22 نومبر تک نئی دہلی میں ہوگا اور اس میں شرکت کا فیصلہ ادارہ جاتی مشاورت اور ضابطہ کار کے مراحل پورے ہونے کے بعد قیادت کرے گی۔

مکہ اتحاد کے حوالے سے انہوں نے بتایا کہ رکن ممالک کا ایران کے ساتھ پہلا مشاورتی اجلاس اس اتحاد کے دفاعی اور امن پسند مقاصد کا مظہر ہے۔ ان کا کہنا تھا کہ یہ اتحاد کسی ملک کے خلاف نہیں، بلکہ خطے میں امن و استحکام کے فروغ کے لیے ہے۔ آئندہ اجلاسوں کی تاریخیں ابھی طے نہیں ہوئیں اور مناسب وقت پر مزید ملاقاتیں ہوں گی۔

پاک ایران سرحد پر ترجمان نے کہا کہ آمدورفت جاری ہے، تاہم بارڈر کھلنے کی موجودہ صورت حال کے بارے میں متعلقہ اداروں سے پوچھنا ہوگا۔

ایران اور امریکا کے تنازعے پر سجاد حیدر خان نے کہا کہ پاکستان نے مخلص ثالث کے طور پر مذاکرات کے لیے ہر ممکن سہولت دی اور 47 سال سے ایک دوسرے سے بات نہ کرنے والے دونوں ممالک کو مذاکرات کی میز تک پہنچانے میں کردار ادا کیا۔ ان کے مطابق خطے میں پائیدار امن کے لیے جنگ کے بجائے سیاسی مذاکرات اور سفارت کاری ہی حل ہیں، اور اسلام آباد میں دستخط شدہ مفاہمتی یادداشت پاکستان کی امن کوششوں کا ثبوت ہے۔

ترجمان کا کہنا تھا کہ مذاکراتی عمل میں وقت لگ سکتا ہے، اس دوران انتہائی اقدامات سے بچنا چاہیے۔ جوہری حملے سے متعلق سوال پر انہوں نے کہا کہ اس معاملے پر قیاس آرائی یا تبصرہ مناسب نہیں۔

انہوں نے بتایا کہ آر فور ممالک کے وزرائے خارجہ نے امریکا، اسرائیل اور ایران کے درمیان تنازعے، اسرائیل فلسطین کی صورت حال، یمن میں حوثی حملوں اور آبنائے ہرمز، باب المندب اور بحیرہ احمر میں بحری سلامتی سمیت علاقائی اور عالمی چیلنجز پر تبادلہ خیال کیا۔ وزرائے خارجہ نے مذاکرات، کشیدگی میں کمی اور تنازعات کے پرامن حل کے عزم کا اعادہ کیا اور علاقائی امن پر مشاورت جاری رکھنے پر اتفاق کیا۔

ترجمان کے مطابق سلامتی کونسل نے 5 نومبر کو پاکستان کی پیش کردہ سفارت کاری سے متعلق صدارتی بیان اتفاق رائے سے منظور کیا، جس میں ثالثی، سفارتی رابطوں اور مذاکرات کے تسلسل کی اہمیت اجاگر کی گئی ہے۔