گلگت بلتستان میں ہر سال ایک ہزار گھرانے موسمیاتی آفات کا شکار، وزیراعلیٰ

گلگت بلتستان کے وزیراعلیٰ امجد حسین نے منگل کے روز کہا کہ گلے شیئر جھیلوں کے پھٹنے اور دیگر موسمیاتی آفات سے خطے میں ہر سال تقریباً ایک ہزار گھرانے متاثر ہوتے ہیں، جن کے گھر اور فصلیں تباہ ہو جاتی ہیں اور حکومت کو متاثرہ خاندانوں کی بحالی اور آبادکاری کا مشکل مرحلہ درپیش رہتا ہے۔

یہ بات انہوں نے ماؤنٹین ویمن کلائمیٹ ایوارڈ 2026 کی تقریب میں بطور مہمان خصوصی خطاب کرتے ہوئے کہی۔ ایکسپریس ٹریبیون کے مطابق وزیراعلیٰ نے بتایا کہ یہ صورتحال کئی دہائیوں سے جاری ہے اور آنے والے برسوں میں بھی بڑا چیلنج رہے گی۔

انہوں نے کہا، ”ہر سال تقریباً ایک ہزار گھرانے متاثر ہوتے ہیں، گھر اور فصلیں تباہ ہوتی ہیں، اور حکومت کو متاثرہ خاندانوں کی بحالی اور آبادکاری کے دشوار مرحلے سے گزرنا پڑتا ہے۔“

وزیراعلیٰ کے مطابق گلگت بلتستان دنیا کے تین بڑے پہاڑی سلسلوں کے سنگم پر واقع ہے اور یہاں تقریباً آٹھ ہزار گلیشیئر ہیں۔ کئی بستیاں ان گلیشیئرز کے نشیب میں آباد ہیں، جہاں جھیل کے اچانک پھٹنے یا تیز سیلاب سے پورے گاؤں کو نقصان پہنچ سکتا ہے۔

انہوں نے کہا، ”گلگت بلتستان کے گلیشیئر پورے پاکستان کے لیے پانی کا اہم ذخیرہ ہیں اور ان کے تحفظ کے لیے قومی اور بین الاقوامی سطح پر مشترکہ اور عملی اقدامات ناگزیر ہیں۔“ انہوں نے ملکی اور غیر ملکی سطح پر مربوط کوششوں کی ضرورت پر زور دیا۔

نقصان صرف گھروں اور کھیتوں تک محدود نہیں۔ امجد حسین نے کہا کہ سڑکیں، بجلی گھر، اسکول اور کالج بھی متاثر ہوتے ہیں اور انہیں دوبارہ چلانے پر ہر سال اربوں روپے خرچ ہوتے ہیں۔ ان کے بقول اس اخراجات سے خطے کے محدود ترقیاتی وسائل پر مزید دباؤ پڑتا ہے۔

وزیراعلیٰ نے کہا کہ ابھی تک کوئی مخصوص ادارہ گلیشیئرز کے تحفظ یا ان سے وابستہ خطرات کے مطالعے پر مامور نہیں تھا۔ اسی ضرورت کے پیش نظر گلیشیئر پروٹیکشن اتھارٹی قائم کی گئی ہے۔

انہوں نے مطالبہ کیا کہ مختلف بلندیوں پر واقع گلیشیئرز پر موسمیاتی تبدیلی کے اثرات کا سائنسی طریقے سے جائزہ لیا جائے، تاکہ حفاظتی اقدامات عمومی اندازوں کی بجائے ٹھوس معلومات کی بنیاد پر کیے جا سکیں۔