لاہور: ٹک ٹاک ویڈیو کے دوران درندے کا حملہ، 19 سالہ ملازم ہلاک

لاہور کے علاقے کاہنہ میں ایک نجی بریڈنگ فارم ہاؤس کے مالک اور وہاں ٹک ٹاک ویڈیو بنانے کے لیے آنے والے شخص کو پولیس نے گرفتار کر لیا ہے، جبکہ فارم ہاؤس سیل کر دیا گیا ہے۔ یہ کارروائی فارم کے 19 سالہ ملازم کے درندے کے حملے میں ہلاک ہونے کے بعد کی گئی۔

تھانہ کاہنہ میں 12 نومبر کو مقتول کے والد منیر احمد کی مدعیت میں درج ایف آئی آر کے مطابق حملہ 11 نومبر کی شام تقریباً پانچ بجے ہوا۔

ایف آئی آر میں کہا گیا ہے کہ نعمان حسن نامی شخص فارم ہاؤس پہنچا اور وہاں کام کرنے والے طلحہ کو ویڈیو بنانے کے لیے بلایا۔ مدعی کے مطابق نعمان نے درندے کو پنجرے سے باہر نکال کر ویڈیو بنانی شروع کی، جس پر اس نے طلحہ پر حملہ کر دیا۔ منیر احمد کا کہنا ہے کہ یہ سب انہوں نے، ان کے بیٹے ہاشم اور بھائی عبدالقیوم نے اپنی آنکھوں سے دیکھا۔

ایف آئی آر کے مطابق زخمی طلحہ کو گاڑی میں سینٹرل پارک ہسپتال لے جایا گیا جہاں وہ زخموں کی تاب نہ لا کر وفات پا گئے۔ شکایت میں فارم ہاؤس کے مالک فیاض عرف فیضی پر مناسب حفاظتی انتظامات نہ کرنے کا الزام لگایا گیا ہے۔

مقدمہ تعزیرات پاکستان کی دفعہ 289 اور 322 کے علاوہ پنجاب وائلڈ لائف (پروٹیکشن، پریزرویشن، کنزرویشن اینڈ مینجمنٹ) ایکٹ 1974 کی دفعات 10-اے اور 12 کے تحت درج کیا گیا ہے۔ دفعہ 289 جانور کی حوالگی میں لاپرواہی سے متعلق ہے، جس کی سزا چھ ماہ تک قید، تین ہزار روپے تک جرمانہ یا دونوں ہو سکتی ہے۔ دفعہ 322 قتل بالسبب پر لاگو ہوتی ہے اور ملزم دیت ادا کرنے کا پابند ہوتا ہے۔

ڈی آئی جی آپریشنز لاہور فیصل کامران نے بی بی سی اردو کو بتایا کہ فارم ہاؤس کا مالک، ٹک ٹاکر اور ایک ملازم، تینوں گرفتار کر لیے گئے ہیں۔ ان کے مطابق فارم سیل کر دیا گیا اور حملہ آور درندہ محکمہ جنگلی حیات کے حوالے کر دیا گیا۔

پولیس ترجمان کے مطابق واقعے کو چھپانے کی کوشش کی گئی اور درندے کے حملے کو کتے کا حملہ ظاہر کیا گیا، تاہم تحقیقات میں حقیقت سامنے آ گئی۔ فیصل کامران نے کہا کہ یہ بھی جانچا جا رہا ہے کہ درندہ رکھنے کے لیے مطلوبہ اجازت نامے موجود تھے یا نہیں اور حفاظتی انتظامات کس حد تک کیے گئے تھے۔ انہوں نے کہا کہ ٹک ٹاک کا شوق کسی انسانی جان سے بڑا نہیں ہو سکتا اور شوق یا تفریح کے نام پر کسی کی جان خطرے میں ڈالنے کی اجازت نہیں دی جائے گی۔

نعمان حسن کے ٹک ٹاک اکاؤنٹ پر نو لاکھ 28 ہزار سے زیادہ فالوورز ہیں اور اس پر شیروں کے ساتھ بنائی گئی کئی ویڈیوز موجود ہیں۔

لاہور میں اس سے پہلے بھی پالتو شیروں کے حملے ہوئے ہیں۔ رواں سال جنوری میں الگ الگ واقعات میں دو بچے زخمی ہوئے اور ایک بچے کا بازو کاٹنا پڑا۔ اس کے بعد پنجاب حکومت نے شیروں کی افزائش کے اجازت نامے منسوخ کرنے کا فیصلہ کیا تھا۔ ڈبلیو ڈبلیو ایف پاکستان کی ڈائریکٹر بائیو ڈائیورسٹی عظمیٰ خان نے جنوری میں بی بی سی اردو کو بتایا تھا کہ پنجاب میں 18 اضلاع کے لگ بھگ 179 بریڈنگ فارمز پر 584 بڑی بلیوں کی قسم کے جانور پالتو رکھے جا رہے ہیں، جن میں 358 شیر، 194 چیتے اور 10 جیگوار شامل ہیں۔

آج نیوز کے مطابق لاش پوسٹ مارٹم کے لیے مردہ خانے منتقل کر دی گئی۔