اسلام آباد میں معدنیات فورم شروع، 60 ممالک کے سرمایہ کار موجود

پاکستان منرلز انویسٹمنٹ فورم 2026 کا آغاز جمعرات کے روز اسلام آباد کے جناح کنونشن سینٹر میں ہو گیا، جس میں 60 سے زائد ممالک کے سرمایہ کار، سفارت کار اور بین الاقوامی کان کنی کمپنیوں کے نمائندے شریک ہیں۔ یہ فورم حکومت پاکستان اور خصوصی سرمایہ کاری سہولت کونسل (ایس آئی ایف سی) کے اشتراک سے منعقد کیا جا رہا ہے۔

فورم کا باضابطہ افتتاح نائب وزیراعظم اور وزیر خارجہ اسحاق ڈار نے کیا۔ افتتاحی سیشن میں پنجاب، سندھ، بلوچستان اور گلگت بلتستان کے وزرائے اعلیٰ، آزاد کشمیر کے وزیراعظم اور خیبر پختونخوا کے گورنر بھی شریک ہوئے۔

اسحاق ڈار نے کہا کہ وزیراعظم شہباز شریف کا وژن پیداواری صلاحیت، برآمدات اور سرمایہ کاری پر مبنی معیشت قائم کرنا ہے۔ ان کا کہنا تھا کہ بلوچستان پاکستان کے معدنی مستقبل میں مرکزی اہمیت رکھتا ہے اور حکومت اس بات کی پابند ہے کہ صوبے کے وسائل سے وہاں کی معیشت اور عوام کو حقیقی فائدہ پہنچے۔ انہوں نے کہا کہ یہ منصوبہ خیبر پختونخوا، معدنی وسائل سے مالا مال شمالی علاقوں، پنجاب اور سندھ پر بھی محیط ہے، اور مقصد صرف معدنیات نکال کر خام شکل میں برآمد کرنا نہیں بلکہ مقامی سطح پر پراسیسنگ، ریفائننگ اور ویلیو ایڈڈ مصنوعات کی تیاری کی صلاحیت پیدا کرنا ہے۔ ان کے مطابق 60 سے زائد ممالک کی شرکت اس شعبے میں بڑھتی ہوئی عالمی دلچسپی ظاہر کرتی ہے۔

گلگت بلتستان کے وزیراعلیٰ امجد حسین آذر نے فورم کو بتایا کہ ان کی حکومت نے معدنیات کی تلاش میں سرمایہ کاری کو آسان بنانے کے لیے ضروری طریقہ کار وضع کر لیے ہیں۔

پنجاب کی وزیراعلیٰ مریم نواز نے کہا کہ صوبائی محکمہ معدنیات کی آمدنی گزشتہ ڈھائی برس میں بڑھ کر 40 ارب روپے ہو گئی ہے۔ انہوں نے بتایا کہ پنجاب کے دریاؤں میں موجود پلیسر گولڈ کی مقدار معلوم کرنے کے لیے سروے اور مطالعات جاری ہیں، چنیوٹ میں 26 کروڑ 15 لاکھ ٹن لوہے کے ذخائر ہیں جنہیں پراسیسنگ کے ذریعے اسٹیل میں بدلا جا سکتا ہے، اور گلابی نمک کی ویلیو ایڈیشن سے بھی آمدنی میں اضافہ ممکن ہے۔

بلوچستان کے وزیراعلیٰ سرفراز بگٹی نے کہا کہ معدنی راہداری کے تحفظ کے لیے ایک اور سکیورٹی ڈویژن قائم کیا گیا ہے تاکہ سرمایہ کاروں کو محفوظ ماحول ملے۔ انہوں نے کہا کہ ریکوڈک 2029 تک فعال ہو جائے گا، صوبائی حکومت سوئی میں فرٹیلائزر سٹی قائم کرنے کا ارادہ رکھتی ہے، اور سارونہ کے علاقے میں سوئی سے بھی زیادہ تیل اور گیس کے ذخائر موجود ہیں۔

خیبر پختونخوا کے گورنر فیصل کریم کنڈی نے کہا کہ صوبے میں مائنز اینڈ منرلز کمپنی جلد فعال کر دی جائے گی اور سرمایہ کاروں کو مکمل سکیورٹی فراہم کی جائے گی۔

سندھ کے وزیراعلیٰ سید مراد علی شاہ نے کہا کہ صوبے میں 27 مختلف معدنیات کی نشاندہی ہو چکی ہے اور حکومت نے اس شعبے کے لیے مضبوط نظام قائم کیا ہے۔ انہوں نے تھر کے کوئلے کو صوبے کے اہم معدنی وسائل میں شمار کیا۔ آزاد کشمیر کے وزیراعظم سید افتخار علی گیلانی نے سرمایہ کاروں کو علاقے میں موجود ذخائر اور امکانات تلاش کرنے کی دعوت دی۔

پاکستان میں امریکہ کی نامزد سفیر نیٹلی بیکر نے آج نیوز سے گفتگو میں کہا کہ پاکستان کاروبار اور سرمایہ کاری کے لیے بڑی منڈی ہے اور اہم معدنیات و کان کنی کے شعبے میں وسیع مواقع موجود ہیں۔ انہوں نے کہا کہ فورم کا حجم گزشتہ سال کے مقابلے میں دگنا ہوا ہے اور امید ہے کہ اس سے سرمایہ کاری سے متعلق اہم اعلانات سامنے آئیں گے۔

ایجنڈے کے مطابق وزیراعظم شہباز شریف اور چیف آف ڈیفنس فورسز فیلڈ مارشل سید عاصم منیر جمعہ 13 نومبر کو فورم سے خطاب کریں گے۔