راولاکوٹ بس ٹرمینل پر آپریشن، عوامی ایکشن کمیٹی کا تین ہلاکتوں کا دعویٰ

راولاکوٹ، آزاد کشمیر میں جمعرات کی علی الصبح قانون نافذ کرنے والے اداروں نے بس ٹرمینل کو حال ہی میں کالعدم قرار دی گئی جموں کشمیر عوامی ایکشن کمیٹی کے کارکنوں سے خالی کرایا، جس کے بعد ضلعی انتظامیہ نے پورے شہر میں دو یا اس سے زیادہ افراد کے اکٹھے ہونے پر پابندی عائد کر دی ہے۔

پونچھ ڈویژن کی پولیس نے تصدیق کی ہے کہ بس ٹرمینل پر جھڑپ میں قانون نافذ کرنے والے اداروں کے کئی اہلکار زخمی ہوئے ہیں اور ان کی تفصیلات جلد جاری کی جائیں گی۔ ڈی آئی جی پونچھ کے دفتر سے جاری پریس ریلیز کے مطابق حکام ’عوامی راستوں پر قائم غیر قانونی رکاوٹیں‘ ہٹا کر آمد و رفت بحال کر رہے تھے کہ مظاہرین میں شامل مسلح افراد نے پولیس پر فائرنگ کی، جس پر پولیس کو جوابی کارروائی کرنی پڑی۔ ریلیز میں کہا گیا ہے کہ مظاہرین میں موجود چند ’مسلح شرپسند‘ افراد کے زخمی ہونے کی اطلاعات ہیں۔

عوامی ایکشن کمیٹی کے رکن عابد شاہین نے بی بی سی اردو کو بتایا کہ سکیورٹی فورسز نے صبح تقریباً پانچ بجے آپریشن شروع کیا اور کارکنوں پر براہ راست فائرنگ کی، جس میں تین افراد ہلاک اور کئی زخمی ہوئے۔ ان کا کہنا تھا کہ ان کے ساتھیوں کو اب بھی نشانہ بنایا جا رہا ہے اور بس ٹرمینل پر فورسز کا کنٹرول ہونے کے باوجود کمیٹی کے کارکن اس کے گردونواح میں موجود ہیں۔ عابد شاہین کے مطابق کمیٹی کے کارکن تینوں میتوں کے ہمراہ ڈی چوک پر احتجاج کر رہے ہیں۔

سرکاری حکام نے کسی ہلاکت کی تصدیق نہیں کی۔ ضلعی انتظامیہ کے ایک سینیئر اہلکار نے بی بی سی اردو کو بتایا کہ بس ٹرمینل کا علاقہ اب قانون نافذ کرنے والے اداروں کے کنٹرول میں ہے جبکہ ڈی چوک پر چند مظاہرین موجود ہیں۔ انہوں نے بتایا کہ آپریشن تقریباً پانچ بجے شروع ہوا اور ڈھائی گھنٹے جاری رہا، اور اس دوران اداروں اور تنظیم کے کارکنوں کے درمیان فائرنگ کا تبادلہ بھی ہوا۔

ضلعی انتظامیہ نے دفعہ 144 نافذ کرتے ہوئے شہریوں کو ہدایت کی ہے کہ وہ خود اور اپنے بچے گھروں تک محدود رکھیں اور کسی اجنبی شخص کو پناہ نہ دیں، کیونکہ انتظامیہ کے مطابق ’شرپسندوں کی جانب سے فورسز پر فائرنگ کی جا رہی ہے‘۔ ایک اہلکار کے مطابق دفعہ 144 کے تحت پانچ یا اس سے زیادہ افراد کے جمع ہونے کو محدود کیا جا سکتا ہے، اسی لیے ضلعی انتظامیہ نے دو یا زیادہ افراد کے اکٹھے ہونے پر پابندی لگائی ہے، اور صورتحال بہتر ہونے پر یہ پابندی واپس لے لی جائے گی۔

پولیس کا کہنا ہے کہ جمعرات کے واقعے کے بارے میں سوشل میڈیا پر ’بے بنیاد اور گمراہ کن پروپیگینڈا‘ اور ’حقائق کے برعکس من گھڑت افواہیں‘ پھیلائی جا رہی ہیں تاکہ عوام میں خوف و ہراس پیدا کیا جا سکے۔

عوامی ایکشن کمیٹی کے کارکن گزشتہ پانچ ماہ سے اپنے مطالبات کے حق میں اس علاقے میں دھرنا دیے ہوئے ہیں، اور انتظامیہ کے مطابق اسی وجہ سے راولپنڈی سے راولاکوٹ آنے والی ٹریفک متاثر رہتی ہے۔

ادھر ڈسٹرکٹ مجسٹریٹ باغ کی جانب سے جاری اعلامیے میں شہریوں کو ہدایت کی گئی ہے کہ وہ تمام غیر قانونی اسلحہ حکومت کے حوالے کریں اور لائسنس یافتہ اسلحہ معائنے کے لیے دس روز کے اندر پیش کریں، ورنہ ہدایات پر عمل نہ کرنے والوں کے خلاف کارروائی کی جائے گی۔