تھرپارکر ایمبولینس دھماکے کی وجہ واضح نہیں، کمیٹی نے فرانزک رپورٹ کا انتظار کیا

سندھ کے محکمہ صحت کی انکوائری کمیٹی اس حتمی نتیجے تک نہیں پہنچ سکی کہ 28 اکتوبر کی رات تھرپارکر کے علاقے ڈانو داندل کے بنیادی مرکز صحت کے باہر کھڑی ایمبولینس میں آگ کیسے لگی اور دھماکہ کیسے ہوا۔ اس واقعے میں نومولود بچی سمیت کم از کم 10 افراد ہلاک ہوئے، جن میں ایک ہی خاندان کے پانچ افراد شامل تھے۔ کمیٹی نے اپنی رپورٹ میں کہا ہے کہ دھماکے کی وجہ صرف فرانزک اور تکنیکی تحقیقات سے طے ہو سکتی ہے۔

کمیٹی 29 اکتوبر کو قائم کی گئی تھی اور اس کے کنوینر ڈائریکٹر جنرل ہیلتھ سروسز سندھ تھے۔ کمیٹی نے 30 اکتوبر کو جائے وقوعہ کا دورہ کیا اور عینی شاہدین کے بیانات، تصاویر، جسمانی شواہد اور مرکز صحت کا دستیاب ریکارڈ چیک کیا۔

رپورٹ کے مطابق مرکز صحت میں ایک خاتون کے ہاں بچی کی پیدائش کے بعد ان کی طبیعت بگڑنے پر انہیں ڈسٹرکٹ ہیڈ کوارٹر ہسپتال مٹھی منتقل کیا جا رہا تھا۔ ایمبولینس میں نصب آکسیجن سلنڈر خالی پایا گیا اور عملہ اس کی جگہ بھرا ہوا سلنڈر لگانے کی کوشش کر رہا تھا۔

عینی شاہدین کے مطابق دھماکہ نیا سلنڈر لگاتے وقت یا اس کے فوراً بعد ہوا۔ عینی شاہد امولک نے کمیٹی کو بتایا کہ فلومیٹر زبردستی کھولا جا رہا تھا، جبکہ کمیونٹی مڈ وائف ثمینہ نے کہا کہ اس وقت ایمبولینس کا انجن بھی چل رہا تھا۔ ثمینہ اس واقعے میں زخمی ہوئیں اور مٹھی میں ابتدائی علاج کے بعد انہیں کراچی کے لیاقت نیشنل ہسپتال منتقل کیا گیا۔

کمیٹی کا کہنا ہے کہ دستیاب شواہد سے یہ طے نہیں ہو سکا کہ دھماکہ آکسیجن سلنڈر، والو یا ریگولیٹر کی خرابی، سلنڈر لگانے کے طریقے میں غلطی، کسی آلے کے استعمال، آگ لگنے کے کسی ذریعے یا گاڑی کے برقی نظام کی خرابی سے ہوا۔

کمیٹی نے یہ سوال بھی اٹھایا کہ ایمرجنسی میں مریضہ کی منتقلی کے وقت ایمبولینس کا آکسیجن سلنڈر خالی کیوں تھا، روانگی سے قبل گاڑی اور طبی آلات کی جانچ کون کرتا تھا اور آکسیجن کی دستیابی کی ذمہ داری کس پر عائد تھی۔

رپورٹ میں بتایا گیا کہ مرکز صحت میں فائر ایکسٹنگوئشر موجود تھا لیکن اسے مناسب جگہ لگانے کے بجائے بند اسٹور میں رکھا گیا تھا۔ کمیٹی کے مطابق اگر یہ فوری دستیاب ہوتا تو ابتدائی مرحلے میں آگ پر قابو پانے کی کوشش کی جا سکتی تھی۔

حادثے میں ہلاک ہونے والے ڈرائیور حاجی پاندی اور چوکیدار اسحاق سگریٹ نوشی کے عادی تھے، تاہم کسی عینی شاہد نے سلنڈر تبدیل کرنے یا مریضہ کو منتقل کرنے کے دوران ان میں سے کسی کو سگریٹ پیتے نہیں دیکھا۔ کمیٹی نے یہ بھی جانچا کہ آیا گاڑی میں کوئی گیس سلنڈر نصب تھا یا وہ ایل پی جی یا سی این جی پر چلائی جا رہی تھی، اور اس مقصد کے لیے اسلام کوٹ کے ایک فلنگ اسٹیشن کا ریکارڈ دیکھا۔ 30 اکتوبر کو معائنے کے وقت سلنڈر درست حالت میں موجود تھا۔

ڈسٹرکٹ ہیلتھ آفیسر تھرپارکر ڈاکٹر لیکھراج نے بتایا کہ خاتون کی ڈلیوری نارمل ہوئی تھی لیکن انہیں غیر معمولی خون بہنے لگا، جس کے باعث انہیں مٹھی منتقل کرنا پڑا۔ ان کے مطابق اس وقت سلنڈر میں آکسیجن کم محسوس ہوئی، ڈرائیور اور دیگر عملے نے سلنڈر بدلنا شروع کیا اور اسی دوران شدید دھماکہ ہو گیا۔

جسونت میگھواڑ آگ میں زخمی ہونے کے بعد مٹھی منتقل کیے گئے، جہاں انہوں نے رات تقریباً ساڑھے گیارہ بجے دم توڑ دیا۔ سریش میگھواڑ کی کمسن بیٹی کو ننگرپارکر اور پھر مٹھی سے کراچی ریفر کیا گیا تھا، جہاں 29 اکتوبر کی شام ٹراما سینٹر میں ان کی موت ہو گئی۔ امولک نے اس واقعے میں اپنی ماں، بہن، بھائی، چاچی اور نومولود بھانجی کو کھو دیا۔

حاجی پاندی گذشتہ 21 سال سے ڈانو داندل کے بی ایچ یو پلس میں بطور ڈرائیور تعینات تھے۔ مرکز صحت میں تعینات ڈاکٹر آکاش کے مطابق یہاں گائنی ڈاکٹر موجود نہیں اور نارمل ڈلیوری کمیونٹی مڈ وائف کی مدد سے کی جاتی ہے، جبکہ یہ مرکز ماہانہ سو سے زیادہ ڈلیوریاں کروا سکتا ہے۔ ڈی ایچ او کے مطابق ضلع بھر میں بنیادی مراکز صحت اور ڈسپنسریوں کی کل تعداد 310 ہے۔