کراچی بندرگاہ پر پھنسے افغان کنٹینرز کی نیلامی روک دی گئی

پاکستان کسٹمز نے کراچی بندرگاہ پر افغان تاجروں کے ان کنٹینرز کی نیلامی روک دی ہے جو عرصے سے وہاں پھنسے ہوئے تھے۔ یہ بات کسٹمز کے ڈائریکٹر جنرل ٹرانزٹ ٹریڈ عرفان جاوید نے بی بی سی اردو کے صحافی تنویر ملک کو بتائی۔ اس سے چند روز قبل سینکڑوں کنٹینرز کے دروازے کھول کر ان کا سامان خریداروں کو دکھایا جا رہا تھا۔

عرفان جاوید کے مطابق نیلامی پاک افغان چیمبر کی درخواست پر معطل کی گئی ہے۔ انہوں نے کہا: ’نہ صرف ملکی بندرگاہوں پر بلکہ طورخم اور چمن بارڈر پر روکے گئے کنٹینرز کی نیلامی بھی نہیں ہو رہی۔‘

بی بی سی پشتو کی ایک رپورٹ کے مطابق کراچی بندرگاہ کی انتظامیہ نے پھنسے ہوئے سینکڑوں کنٹینرز میں موجود سامان نیلامی کے لیے پیش کیا تھا، اور نیلامی کرنے والی کمپنی کی جاری کردہ تصاویر میں دیکھا جا سکتا تھا کہ کنٹینرز کے دروازے کھول کر سامان خریداروں کو دکھایا جا رہا ہے۔

ایک افغان تاجر مطیع اللہ نے بی بی سی پشتو سے بات کرتے ہوئے تصدیق کی کہ افغانستان اور پاکستان کے درمیان تجارتی اور ٹرانزٹ راستے بند ہونے کے بعد کراچی بندرگاہ میں پھنسے افغان تاجروں کے سامان کی نیلامی چند روز قبل شروع ہوئی تھی۔ ان کے مطابق یہ سامان مالکان کو اطلاع دینے اور قانونی نوٹسز جاری کرنے کے بعد نیلامی کے لیے پیش کیا گیا، اور افغان تاجر اب بھی عدالت سے رجوع کر کے نیلامی روک سکتے ہیں۔

کراچی بندرگاہ میں کھڑے ان کنٹینرز پر بھاری ٹیکس اور گودام و پارکنگ کے اخراجات جمع ہوتے گئے، جنہیں ادا کرنے سے قاصر کئی تاجر اپنا مال نہیں چھڑا سکے۔

پاکستان نے رواں سال کے آغاز میں کہا تھا کہ افغان تاجر کراچی اور دیگر بندرگاہوں سے اپنا پھنسا ہوا مال اصل ملک یا کسی دوسرے ملک منتقل کر سکتے ہیں۔ افغانستان کے چیمبر آف کامرس اینڈ انڈسٹریز نے اس وقت بتایا تھا کہ پاکستانی بندرگاہوں میں افغان تاجروں کے تقریباً 15 ہزار کنٹینرز پھنسے ہوئے ہیں۔ مشترکہ چیمبر آف کامرس کے حکام نے فروری میں بی بی سی کو بتایا تھا کہ اس سامان میں سے 60 فیصد سے زیادہ ان ممالک کو واپس بھیج دیا گیا تھا جہاں سے درآمد کیا گیا تھا، جبکہ کچھ مقدار ایران کی چابہار اور بندر عباس بندرگاہوں کو منتقل کر دی گئی تھی۔ یہ واضح نہیں کہ اب کراچی بندرگاہ پر افغان تاجروں کے کتنے کنٹینرز موجود ہیں۔

عالمی اقتصادی نیٹ ورک میں افغانستان کے شعبے کے سربراہ اور چیمبر آف کامرس اینڈ انویسٹمنٹ کے سابق عہدیدار یونس مومند کا کہنا تھا کہ جو سامان نیلام کیا گیا وہ اسی کھیپ کا حصہ ہے جسے افغان تاجر بلند ٹیکسوں اور سٹوریج کے اخراجات کی وجہ سے کراچی بندرگاہ سے نہیں نکال سکے۔ افغانستان چیمبر آف کامرس کے حکام نے پاکستان کے اس اقدام کو علاقائی اور بین الاقوامی تجارتی قوانین کے خلاف قرار دیا ہے۔

افغانستان کی طالبان حکومت نے متعدد بار پاکستان پر الزام عائد کیا ہے کہ وہ تجارتی اور ٹرانزٹ تعلقات کو سیاسی مقاصد کے لیے استعمال کرتا ہے، تاہم پاکستان کا کہنا ہے کہ راستے سکیورٹی وجوہات کی بنا پر بند کیے گئے ہیں۔ طالبان حکومت کی وزارت صنعت و تجارت کے اعداد و شمار کے مطابق 2024 میں دونوں ملکوں کے درمیان تجارت کا حجم 2.5 ارب ڈالر تھا، جو گزشتہ سال 2025 میں کم ہو کر 1.8 ارب ڈالر رہ گیا، جبکہ رواں سال اب تک ٹرانزٹ اور تجارت کے تمام راستے بند ہیں۔