کراچی میں فلیٹ سے میاں بیوی اور تین بچیوں کی لاشیں برآمد
احسن آباد کے لاکھانی ٹاورز میں بدبو کے بعد پولیس داخل ہوئی تو پانچوں لاشیں ملیں، موت کی وجہ تاحال معلوم نہیں
کراچی پولیس ایک ڈاکٹر، ان کی اہلیہ اور تین کم عمر بیٹیوں کی ہلاکت کی تحقیقات کر رہی ہے جن کی لاشیں اتوار کو احسن آباد کے علاقے میں واقع لاکھانی ٹاورز کی ساتویں منزل کے فلیٹ سے ملیں۔ ڈپٹی سپرنٹنڈنٹ آف پولیس اورنگزیب خٹک نے بی بی سی اردو کو بتایا کہ لاشیں تین سے چار روز پرانی اور خراب حالت میں تھیں۔
انہوں نے کہا کہ عمارت کے رہائشیوں نے فلیٹ سے شدید بدبو آنے پر 15 پر پولیس کو اطلاع دی۔ جب پولیس نے دروازہ توڑا تو ڈاکٹر عمر اور ان کی اہلیہ کی لاشیں ایک کمرے میں اور تینوں بچیوں کی لاشیں دوسرے کمرے میں پڑی تھیں۔ ایک بچی کی لاش بستر پر اور دو بچیوں کی لاشیں گدے پر تھیں۔
پوسٹ مارٹم مکمل کر لیا گیا ہے لیکن موت کی اصل وجہ کیمیکل تجزیے کی رپورٹ آنے کے بعد ہی معلوم ہو سکے گی جس میں تین سے چار روز لگیں گے۔ پولیس سرجن ڈاکٹر سمعیہ کے مطابق لاشیں انتہائی خستہ حالت میں تھیں اور تمام اندرونی اعضا کے نمونے حاصل کر لیے گئے ہیں، تاہم موت کی وجہ ابھی تک سامنے نہیں آئی۔ اس معاملے میں ابھی تک ایف آئی آر درج نہیں ہوئی۔
اورنگزیب خٹک نے کہا کہ فلیٹ کے اندر تشدد، چوری یا ڈکیتی کے کوئی واضح شواہد نہیں ملے۔ فلیٹ کو سیل کر دیا گیا ہے اور اس منزل پر موجود دیگر فلیٹس بھی خالی تھے۔ سندھ کے انسپکٹر جنرل آف پولیس جاوید عالم اوڈھو نے سینئر تفتیشی اور فارنزک ماہرین پر مشتمل اعلیٰ سطح کی تحقیقاتی ٹیم تشکیل دینے کا حکم دیا ہے۔
اسی عمارت کی چھٹی منزل پر رہائش پذیر کامران بخاری نے بی بی سی اردو کو بتایا کہ یہ خاندان تقریباً ڈھائی سے تین برس سے یہاں رہ رہا تھا اور ان کا رویہ انتہائی سادہ اور اچھا تھا۔ انہوں نے کہا کہ بدبو اتنی شدید تھی کہ وہاں رہنا مشکل ہو گیا تھا اور ٹاور میں کسی کو معلوم نہیں کہ فلیٹ کے اندر کیا ہوا۔ بخاری اور پولیس کے مطابق ڈاکٹر عمر کا تعلق بہاولنگر سے تھا۔
ڈی ایس پی اورنگزیب خٹک نے بتایا کہ ڈاکٹر عمر احسن آباد کے سٹی ہسپتال میں ملازم تھے لیکن ساتھیوں کے مطابق وہ ایک ماہ قبل ملازمت چھوڑ چکے تھے۔ پولیس کے پاس موجود معلومات کے مطابق ڈاکٹر عمر کچھ عرصے سے بیمار تھے اور انہیں کینسر کی تشخیص ہوئی تھی۔ ضلع غربی کے ایس ایس پی زبیر نذیر شیخ نے مقامی میڈیا کو بتایا کہ ڈاکٹر عمر کے بھائی پنجاب میں ہیں لیکن رابطے پر انہوں نے لاتعلقی کا اظہار کیا۔ پولیس مزید رشتہ داروں سے رابطہ کرنے کی کوشش کر رہی ہے۔
سندھ ہائی کورٹ: وکلاء کو سات دن میں گاڑیوں سے سرکاری نشانات ہٹانے کا حکم
رجسٹرار کے مطابق نجی گاڑیوں پر سبز نمبر پلیٹیں، نیلی روشنیاں اور جعلی سرکاری پلیٹیں رکھنے والوں کو ہائی کورٹ، سٹی کورٹ اور ضلعی عدالتوں میں داخلے کی اجازت نہیں ہوگی۔
اقرارالحسن کو سائبر کرائم مقدمے میں ضمانت مل گئی
کراچی کی عدالت نے دو لاکھ روپے کے مچلکوں پر رہائی کا حکم دیا، این سی سی آئی اے نے ایکس، انسٹاگرام اور فیس بک پر پوسٹوں کے الزام میں گرفتار کیا تھا۔
عالمی بینک نے سندھ میں جائیداد ٹیکس اور بلدیاتی خدمات کے لیے 15 کروڑ ڈالر منظور کیے
سندھ پراپرٹی ریونیوز اینہانسمنٹ پروگرام صوبائی حکومت کو شہری جائیداد ٹیکس کی وصولی بہتر بنانے اور منتخب مقامی کونسلوں کی خدمات کی صلاحیت مضبوط کرنے میں مدد دے گا، خصوصاً کراچی میں۔
سندھ میں بلدیاتی اداروں کے جائزے اور بجٹ آڈٹ کے لیے کمیٹی قائم
وزیر بلدیات سید ناصر حسین شاہ کی سربراہی میں بننے والی کمیٹی یونین کونسلوں سے ضلعی کونسلوں تک غیر قانونی بھرتیوں اور بجٹ کی بے ضابطگیوں کی جانچ کرے گی۔