جامشورو: فریزر سے 1700 مردہ جنگلی پرندے برآمد، پانچ گرفتار

سندھ کے ضلع جامشورو میں محکمہ جنگلی حیات کی کارروائی کے دوران فریزرز میں محفوظ 1700 مردہ جنگلی پرندے برآمد ہوئے اور پانچ افراد کو گرفتار کر لیا گیا۔ محکمہ کے مطابق ملزمان پر الزام ہے کہ وہ جال کے ذریعے پرندے پکڑتے، انہیں ذبح کر کے محفوظ کرتے اور پھر مختلف اضلاع کی منڈیوں میں گوشت فروخت کرتے تھے۔

محکمہ جنگلی حیات کے چیف کنزرویٹر جاوید احمد مہر نے بتایا کہ برآمد شدہ پرندوں میں بیبلر، کوٹس، ملرڈ، پن ٹیل اور دیگر انواع شامل ہیں۔ یہ پرندے ذبح شدہ حالت میں ملے اور موقع پر ان کی کھال اور پر بھی موجود تھے۔ ان کے مطابق ان میں 700 سے زائد ایسے پرندے بھی شامل ہیں جنہیں کھانے کے لیے حلال نہیں تصور کیا جاتا، تاہم ملزمان گوشت کو کھانے کے قابل اور حلال قرار دے کر بیچتے تھے۔

مہر کا کہنا تھا کہ جنگلی پرندوں کی غیر قانونی تجارت صرف گوشت کی فروخت کا معاملہ نہیں بلکہ جنگلی حیات کے تحفظ سے بھی جڑی ہے، کیونکہ ہر نوع کی اپنی ماحولیاتی اہمیت ہوتی ہے۔

محکمہ کے مطابق ملزمان جال لگا کر پرندے پکڑتے، ذبح کرنے کے بعد فریزر میں رکھتے اور آرڈر آنے پر مختلف اضلاع کی مارکیٹوں میں سپلائی کرتے تھے۔

گرفتار افراد میں امام بخش ملاح، نظام الدین ملاح، راشد سولنگی، شاہنواز سولنگی اور سلطان ملاح شامل ہیں۔ ان کے خلاف سندھ وائلڈ لائف پروٹیکشن ایکٹ 2020 کے تحت مقدمہ نمبر 11 درج کیا گیا ہے، جو سمری ٹرائل کے لیے ضلع و سیشن جج جامشورو کی عدالت میں پیش کیا جائے گا۔

چیف کنزرویٹر کے مطابق متعلقہ قوانین کا ازسرنو جائزہ لے کر منظوری دی گئی ہے، خلاف ورزی کرنے والوں کے لیے سزاؤں اور جرمانوں میں اضافہ کیا گیا ہے اور مقدمات کے فوری فیصلوں کے لیے سمری ٹرائل کا طریقہ کار اپنایا گیا ہے۔ سیشن جج کی عدالت کو ٹرائل کورٹ قرار دیا گیا ہے تاکہ جنگلی حیات سے متعلق مقدمات کی سماعت اور فیصلوں کا عمل تیز ہو سکے۔

محکمہ کے اعداد و شمار کے مطابق 2020 سے 2026 کے دوران جنگلی حیات سے متعلق قوانین کی خلاف ورزی پر مجموعی طور پر 440 مقدمات درج کیے گئے۔ ان میں سے 309 مقدمات کے فیصلے عدالتیں سنا چکی ہیں جبکہ 131 مقدمات اب بھی زیر سماعت ہیں۔ مہر نے ان مقدمات میں سزا کی شرح 70 فیصد بتائی۔

محکمہ کے مطابق جامشورو، دادو، قمبر، ٹھٹھہ، سجاول اور بدین جنگلی پرندوں کی غیر قانونی تجارت کے اہم مراکز میں شمار ہوتے ہیں، اور ان علاقوں میں پرندوں کے غیر قانونی شکار اور تجارت کی روک تھام کے لیے دفعہ 144 کے تحت پابندی بھی نافذ کی جا چکی ہے۔