مریم نواز کا فصلوں کی باقیات جلانے کے خلاف صوبہ بھر میں آپریشن کا حکم

لاہور: پنجاب کی وزیراعلیٰ مریم نواز شریف نے فصلوں کی باقیات جلانے کے خلاف صوبہ بھر میں کارروائی کا حکم دیا ہے اور خاص طور پر اوکاڑہ اور دیگر متاثرہ اضلاع کے ڈپٹی کمشنروں کو اس عمل کو روکنے میں ناکامی پر خبردار کیا ہے۔

جمعرات کو لاہور میں ڈپٹی کمشنروں کی کارکردگی کے جائزے کے لیے منعقدہ خصوصی اجلاس کی صدارت کرتے ہوئے انہوں نے خوبصورتی کے منصوبوں میں تاخیر اور غیر معیاری کام پر ناراضی کا اظہار کیا اور ضلعی انتظامیہ کو معیار، پائیداری اور بروقت تکمیل یقینی بنانے کی ہدایت کی۔

دا نیشن کی رپورٹ کے مطابق پنجاب پرفارمنس مینجمنٹ یونٹ کے سربراہ اور خصوصی معاون شعیب مرزا نے ضلع وار کارکردگی کے اہم اشاریے پیش کیے، جبکہ وزیراعلیٰ نے مری، گوجرانوالہ، اٹک، بہاولپور، چکوال، جہلم، لیہ اور ساہیوال کی انتظامیہ کی کارکردگی کو سراہا۔

انہوں نے عوامی سہولیات کے معائنے اور 12 گھنٹے کے اندر اصلاحی اقدامات کے لیے گورننس اور روڈ مینٹیننس کے الگ اسکواڈ قائم کرنے کی ہدایت دی۔ خوبصورتی کے منصوبوں میں فوارے اور آبی خصوصیات شامل کرنے، سٹریٹ لائٹس کو مسلسل فعال رکھنے، مین ہولز کو ڈھانپنے اور زیبرا کراسنگ اور سکولوں کی حفاظت کے انتظامات بہتر بنانے کی ہدایات بھی دیں۔

سرکاری اسپتالوں کی حالت بہتر بنانے کے لیے ڈپٹی کمشنروں کو تین دن دیے گئے۔ انہیں اور اسسٹنٹ کمشنروں کو روزانہ اسپتالوں کا دورہ کرنے اور گہری صفائی یقینی بنانے کا کہا گیا، جبکہ صوبے بھر میں سڑکوں کی روزانہ دھلائی کا حکم دیا گیا۔ اسسٹنٹ کمشنروں کو غیر فعال واٹر فلٹریشن پلانٹس بحال کرنے اور ضلعی انتظامیہ کو جنرل بس ٹرمینلز اور گرین بس شیلٹرز کی مرمت، دیکھ بھال اور صفائی کی ہدایت کی گئی۔

اجلاس میں خالی پلاٹوں کو کوڑے دان کے طور پر استعمال ہونے سے روکنے کے لیے تین مرحلوں پر مشتمل طریقہ کار منظور کیا گیا: پہلی خلاف ورزی پر انتباہ، دوسری پر بھاری جرمانہ اور تیسری پر ایف آئی آر کا اندراج۔

وزیراعلیٰ نے صوبہ بھر میں تجاوزات کے خلاف آپریشن اور دیواروں پر چاکنگ، پھٹے بینرز اور چھوٹے اشتہاری پوسٹروں کو عوامی مقامات سے ہٹانے کا حکم دیا اور آوارہ کتوں پر قابو پانے کے لیے مؤثر اقدامات کی ہدایت کی۔

دا نیشن کے مطابق انہوں نے کہا: "مناسب لین مارکنگ، تازہ پینٹ شدہ عمارتیں اور صاف سڑکیں ایک اچھے شہر کے لیے ضروری ہیں۔ ڈپٹی کمشنروں یا ضلعی انتظامیہ کی کسی غفلت کا براہ راست اثر حکومت کی شبیہ اور ساکھ پر پڑتا ہے۔"

ڈپٹی کمشنروں کو یونیورسٹیوں اور کالجوں میں طلبہ کو جاری ترقیاتی منصوبوں اور سرکاری اسکیموں پر بریفنگ دینے کی ہدایت کی گئی اور ہر ضلع کو ضلعی اقتصادی منصوبہ تیار کرنے کا کہا گیا۔

اجلاس میں خانیوال کے اکبر بازار، میان چنوں کے مین بازار اور جہانیاں کے اللہ داد بازار کے علاوہ شیخوپورہ، شرقپور اور مریدکے کے خوبصورتی منصوبوں کا جائزہ لیا گیا۔ گوجرانوالہ کے اقدامات کو سراہا گیا۔ ننکانہ صاحب میں چار خوبصورتی منصوبے نومبر تک مکمل کرنے کی ہدایت کی گئی اور راولپنڈی انتظامیہ کو گرین بیلٹس پر توجہ دینے کا کہا گیا۔ وزیراعلیٰ نے رحیم یار خان میں منظور شدہ منصوبوں سے انحراف پر عدم اطمینان کا اظہار کیا اور فوڈ سٹریٹس اور فوڈ کارٹس قابل افراد اور کمپنیوں کے حوالے کرنے کا حکم دیا۔ انہوں نے خبردار کیا کہ ناقص کارکردگی برداشت نہیں کی جائے گی۔