یورو بانڈ قرض کی ٹوکنائزیشن پر غور، کابینہ کی منظوری کا انتظار

پیر کو پاکستان بینکس ایسوسی ایشن اور ایل یو ایم ایس کے اشتراک سے منعقدہ ”ڈائیلاگ آن ڈیجیٹل اثاثے اور بینکاری کا مستقبل“ سے خطاب کرتے ہوئے وزیر خزانہ محمد اورنگزیب نے کہا کہ حکومت پاکستان کے موجودہ یورو بانڈ قرض کی ٹوکنائزیشن پر غور کر رہی ہے اور اس حوالے سے درخواست برائے تجاویز (آر ایف پی) جاری کرنے سے قبل کابینہ کی منظوری حاصل کی جائے گی۔

انہوں نے کہا کہ وزارت خزانہ میں اس وقت اس تجویز پر مشاورت جاری ہے۔ بزنس ریکارڈر کی رپورٹ کے مطابق اس بارے میں کوئی تفصیل نہیں بتائی گئی کہ کون سے یورو بانڈ اس اقدام کے دائرے میں آئیں گے، قرض کا حجم کتنا ہوگا اور درخواست برائے تجاویز کب جاری ہوگی۔

وزیر خزانہ نے کہا: ”اس وقت وزارت خزانہ اور حکومت پاکستان کی سطح پر ہم اس بات کا جائزہ لے رہے ہیں کہ ہمارے موجودہ یورو بانڈ قرض کی ٹوکنائزیشن کی جائے۔ ہم اس وقت مشاورت کر رہے ہیں اور اس حوالے سے آر ایف پی جاری کرنے سے قبل کابینہ کی منظوری کے منتظر ہیں۔“

ٹوکنائزیشن کا مطلب کسی اثاثے، اس معاملے میں قرض کے ایک آلے، کی ڈیجیٹل نمائندگی جاری کرنا ہے جسے ڈسٹری بیوٹڈ لیجر پر درج کیا جا سکے اور اس کی تجارت ممکن ہو۔

وزیر خزانہ نے بینکوں پر زور دیا کہ وہ اس حوالے سے عملی تجاویز پیش کریں۔ انہوں نے کہا: ”آپ کسٹمر تعلقات، آپریشنل تجربہ اور رسک مینجمنٹ کی وہ صلاحیت لے کر آتے ہیں جو اس کام کے لیے درکار ہے۔ ان ٹیکنالوجیز کا جائزہ لینے کے لیے مہارت میں سرمایہ کاری کریں اور متعلقہ ریگولیٹرز کے ساتھ مل کر اپنے مینڈیٹ کے دائرے میں اجازت یافتہ سرگرمیوں پر کام کریں، اور یقیناً اپنے بورڈز کی معاونت سے۔“

پاکستان نے ورچوئل اثاثہ جات ایکٹ 2026 کے تحت اس شعبے کا قانونی ڈھانچہ قائم کیا ہے، جس کے تحت پاکستان ورچوئل اثاثہ جات ریگولیٹری اتھارٹی کو ورچوئل اثاثہ جات کی خدمات فراہم کرنے والوں کے لائسنس اور نگرانی کی ذمہ داری دی گئی ہے۔

سٹیٹ بینک آف پاکستان نے بھی بینکوں کے لیے مشروط راستہ کھولا ہے کہ وہ اس اتھارٹی کے لائسنس یافتہ کاروباروں کو خدمات فراہم کر سکیں، بشرطیکہ ڈیو ڈیلیجنس کی جائے اور کلائنٹ کے فنڈز الگ رکھے جائیں۔

تاہم وزیر خزانہ کے مطابق بینکوں پر یہ پابندی برقرار ہے کہ وہ اپنے فنڈز یا کسٹمر ڈپازٹس استعمال کرتے ہوئے ورچوئل اثاثوں میں سرمایہ کاری یا تجارت نہیں کر سکتے اور نہ انہیں اپنے پاس رکھ سکتے ہیں۔

انہوں نے کہا کہ ڈیجیٹل مالیاتی جدت کے ساتھ حفاظتی اقدامات، ریگولیٹری نگرانی اور سائبر سیکیورٹی لازمی ہیں۔ ”ہمیں یہ تسلیم کرنا ہوگا کہ ہم پر ریاستی اور غیر ریاستی عناصر کی جانب سے 24/7 حملے ہو رہے ہیں، اس لیے کسی کوتاہی کی گنجائش نہیں۔“