صوبوں کی تقسیم قبول نہیں، ٹی وی سرویز مسترد: شرجیل میمن

سینئر صوبائی وزیر شرجیل انعام میمن نے کہا ہے کہ سندھ کی تقسیم کسی صورت قبول نہیں، ٹی وی چینلز کے سرویز سے کوئی فرق نہیں پڑتا کیونکہ سندھ اسمبلی اس حوالے سے قرارداد منظور کرچکی ہے۔ انہوں نے کہا کہ پاکستان کو دوبارہ لسانیت کے حوالے نہیں کیا جاسکتا۔

پریس کانفرنس سے خطاب کرتے ہوئے انہوں نے ایم کیو ایم پر لسانیت پھیلانے کا الزام لگایا اور کہا کہ پیپلز پارٹی سندھ میں اپنے 18 سال کا حساب دینے کے لیے تیار ہے۔ انہوں نے کہا کہ پاکستان کا آئین پیپلز پارٹی نے بنایا اور ایٹمی طاقت اور میزائل ٹیکنالوجی بھی پیپلز پارٹی کے دور میں ممکن ہوئی۔

انہوں نے صدر آصف علی زرداری کے دورہ چین کا ذکر کرتے ہوئے کہا کہ سندھ اور چین کا صوبہ حنان سسٹر صوبے ہیں۔ سندھ حکومت چین میں سرمایہ کاری کانفرنس منعقد کررہی ہے جس میں وزیراعلیٰ سندھ بھی شریک ہوں گے۔ چائنا الیکٹرک نے تھر کول منصوبے میں سرمایہ کاری کی ہے اور آئندہ کانفرنس میں اربوں روپے کے معاہدے متوقع ہیں۔

شرجیل میمن نے کہا کہ تھر کول پر ایک ارب ڈالر خرچ ہوئے ہیں اور تھر کا کوئلہ وفاق کو جاتا ہے۔ ان کے مطابق تھرپارکر کے کوئلے سے دو سال تک بجلی برآمد کی جاسکتی ہے۔

صحت کے شعبے کے بارے میں انہوں نے کہا کہ پورے پاکستان سے لوگ علاج کے لیے کراچی آتے ہیں اور سندھ کے اسپتالوں میں شناختی کارڈ نہیں پوچھا جاتا۔ سائبر نائف کا علاج مفت ہے، ایئر ایمبولینس سروس سکھر اور کراچی سے چل رہی ہے، اور پھیپھڑوں اور جگر کی پیوند کاری بھی مفت کی جارہی ہے۔ انہوں نے کہا کہ سیلاب سے متاثرہ 21 لاکھ خاندانوں کو گھر بناکر دیے جارہے ہیں اور گندم کی پیداوار بڑھانے پر بھی کام ہورہا ہے۔

ایم کیو ایم پر تنقید کرتے ہوئے انہوں نے الزام لگایا کہ ایم کیو ایم نے آمریتوں کے دور میں حکومت میں رہنے کے باوجود کراچی میں کوئی اسپتال نہیں بنایا۔ انہوں نے کہا کہ ایم کیو ایم نے 35 ایس ایچ اوز کو قتل کیا، 12 مئی کو پولیس سے اسلحہ چھین کر دہشت گردوں کو دیا، اور شہر میں خونریزی اور ہڑتالیں کرائیں۔ انہوں نے کہا کہ اب سارا ملبہ الطاف حسین پر نہیں ڈالا جاسکتا کیونکہ آج ایم کیو ایم میں شامل لوگ اس وقت بھی ان اقدامات کا دفاع کرتے تھے۔

شرجیل میمن نے کہا کہ وہ خود اردو میں بات کررہے ہیں اور اردو بین الاقوامی زبان بن چکی ہے۔ کراچی پر جتنا حق اردو بولنے والوں کا ہے اتنا ہی سندھی بولنے والوں کا بھی ہے۔ انہوں نے کہا کہ پاکستان کو دوبارہ لسانیت کے حوالے نہیں کیا جائے گا اور اشتعال انگیزی یا بدمعاشی کی اجازت نہیں دی جائے گی۔