سپریم کورٹ نے ضمانت منسوخی کے آٹھ اصول مقرر کر دیے

سپریم کورٹ نے قرار دیا ہے کہ ملزم کو دی گئی ضمانت اس صورت میں واپس لی جا سکتی ہے جب وہ اس رعایت کا غلط استعمال کرے، استغاثہ کے گواہوں کو متاثر کرنے کی کوشش کرے، شہادتیں مٹائے، انصاف کے عمل میں رکاوٹ ڈالے یا عدالت کے دائرہ اختیار سے فرار ہونے کا خدشہ ہو۔ عدالت نے جسٹس محمد علی مظہر کے تحریر کردہ فیصلے میں ضمانت منسوخ کرنے کے آٹھ اصول بیان کیے ہیں۔

فیصلے کے مطابق ضمانت اس صورت میں بھی منسوخ کی جا سکتی ہے جب ضمانت دینے والا حکم نامہ بظاہر غیر قانونی یا ناانصافی پر مبنی ہو۔ اسی طرح اگر ملزم منصفانہ تحقیقات میں مداخلت کرے یا ضمانت پر رہتے ہوئے اسی نوعیت کا کوئی اور جرم کرے تو یہ رعایت واپس لی جا سکتی ہے۔

تحقیقات کے دوران سامنے آنے والے نئے حقائق یا شواہد، جو ملزم کے جرم میں ملوث ہونے کی نشاندہی کریں، بھی ضمانت منسوخ کرنے کی بنیاد بنتے ہیں۔

عدالت نے اپیل مسترد کر دی اور سندھ ہائی کورٹ کے فیصلے کو برقرار رکھا۔

یہ مقدمہ لڑکانہ کے تھانہ رحمت پور میں 3 مارچ 2024 کو درج ہوا تھا، جب نور حسین نامی شخص کی بجلی کی تار ٹوٹنے سے موت ہو گئی۔ کیس ریکارڈ کے مطابق دکانوں کو ڈسپوزل فیز سے نکالی گئی خصوصی لائن کے ذریعے بجلی فراہم کی جا رہی تھی۔

لڑکانہ کی سیشن عدالت نے 30 جنوری 2025 کو ملزم علی اصغر کھوکھر کی ضمانتِ قبل از گرفتاری کی درخواست مسترد کر دی تھی۔ سندھ ہائی کورٹ کی لڑکانہ سرکٹ کورٹ نے 20 اکتوبر 2025 کو ایف آئی آر درج ہونے میں نو ماہ کی تاخیر اور دیگر بنیادوں پر انہیں ضمانت دے دی تھی۔

سپریم کورٹ نے کہا کہ ایف آئی آر کے اندراج میں نو ماہ کی تاخیر اور واقعے میں ملزم کے مبینہ کردار، دونوں مزید تفتیش طلب امور ہیں۔

عدالت نے فیصلے کی نقل واٹر اینڈ پاور ڈویلپمنٹ اتھارٹی (واپڈا) کے چیئرمین کو بھیجنے کی ہدایت بھی دی تاکہ اتھارٹی اور متعلقہ یوٹیلیٹی کمپنی غیر قانونی بجلی کی فراہمی، بجلی کی چوری اور نجی سطح پر بجلی کے استعمال میں ملوث افراد کے کردار کا جائزہ لے سکیں۔