لسبیلہ میں 20 کروڑ روپے کی بینک ڈکیتی، تین ملزمان گرفتار

بلوچستان کے ضلع لسبیلہ میں پولیس نے اوتھل کے نیشنل بینک سے 20 کروڑ 20 لاکھ روپے کی ڈکیتی کے سلسلے میں تین ملزمان کو گرفتار کرنے کا دعویٰ کیا ہے۔ ایس ایس پی لسبیلہ نجیب اللہ پندرانی کے مطابق واردات میں ملوث پانچ افراد لسبیلہ یونیورسٹی آف میرین سائنسز کے موجودہ یا سابق طلبہ ہیں اور ان کی عمریں 25 سے 26 سال کے درمیان ہیں۔

پندرانی نے اوتھل میں پریس کانفرنس میں بتایا کہ مرکزی ملزم یونیورسٹی کا طالب علم تھا جس نے ساتھیوں کے ساتھ مل کر منصوبہ بنایا اور واردات کو عملی جامہ پہنایا۔ پولیس کے مطابق اسی کی نشاندہی پر مزید دو ملزمان گرفتار ہوئے۔ ایس ایس پی کے مطابق 14 روزہ جسمانی ریمانڈ کے بعد عدالت نے جمعرات کو ملزمان کو جوڈیشل ریمانڈ پر جیل بھیج دیا۔

واردات 28 فروری 2025 کو ہوئی تھی۔ بینک منیجر فلک شیر کی مدعیت میں درج ایف آئی آر کے مطابق چھ ملزمان سکیورٹی فورسز کی وردی سے مشابہ لباس میں ایک گاڑی پر بینک کے مرکزی دروازے سے داخل ہوئے اور بتایا کہ وہ کسی ٹرانزیکشن کی تفتیش کے لیے آئے ہیں۔ مزاحمت پر ملزمان نے پولیس اہلکار نواز علی اور محمد داؤد کو رائفل کے بٹ مار کر زخمی کیا اور ان سے ایک جی تھری رائفل چھین لی۔ ایف آئی آر کے مطابق ملزمان نے بینک میں موجود 20 کروڑ 20 لاکھ روپے چھ بوریوں میں بھرے، گاڑی کی ڈگی میں رکھے اور بینک عملے کو کیش والٹ میں بند کر کے فرار ہو گئے۔

اوتھل میں اس وقت تعینات ایس ایچ او یار محمد نے بتایا کہ انہیں صبح نو سے ساڑھے نو بجے کے درمیان اطلاع ملی اور وہ نفری کے ساتھ بینک پہنچے تو ملزمان جا چکے تھے۔ انہوں نے آر سی ڈی شاہراہ اور پھر بلوچ گوٹھ کی جانب گاڑی کا پیچھا کیا۔ ’جب قریب پہنچے تو ملزمان نے فائرنگ کر دی۔ مجھے دو گولیاں لگیں، ایک ٹانگ میں اور دوسری آنکھ کے قریب۔‘ ایس ایس پی کے مطابق اس واقعے میں یار محمد کی ایک آنکھ ضائع ہو گئی۔ ملزمان پہاڑوں کی طرف فرار ہوئے اور اپنی گاڑی کو آگ لگا دی۔

تفتیش سے وابستہ ایک اہلکار نے نام ظاہر نہ کرنے کی شرط پر بتایا کہ گاڑی اس لیے جلائی گئی تاکہ فنگر پرنٹس اور دیگر فرانزک شواہد مٹ جائیں، اور واردات میں استعمال ہونے والے دو ہتھیار بھی گاڑی کے ساتھ جلا دیے گئے۔ پولیس کے مطابق وردیاں کپڑا خرید کر سلوانے کے بجائے دسمبر 2024 میں ایک کمپنی سے آن لائن منگوائی گئیں۔

ایس ایس پی لسبیلہ کے مطابق تفتیش میں مرکزی ملزم کا بینک اکاؤنٹ اہم سراغ ثابت ہوا۔ واردات سے قبل اکاؤنٹ میں معمولی ٹرانزیکشنز ہوتی تھیں جبکہ بعد میں یہ رقم کروڑوں روپے تک پہنچ گئی۔ انہوں نے بتایا کہ گذشتہ ڈیڑھ سال کے دوران اکاؤنٹ میں 17 کروڑ روپے کی ٹرانزیکشنز کا سراغ ملا۔ ان کے مطابق ایک مقامی تاجر کے اکاؤنٹ سے بھی تقریباً پونے تین کروڑ روپے کی ٹرانزیکشن سامنے آئی، تاجر نے اعتراف کر لیا ہے اور اس کا بیان مجسٹریٹ کے سامنے ریکارڈ ہو چکا ہے۔ پولیس کے مطابق چار کروڑ روپے سے زائد مالیت کی گاڑیاں اور دیگر اشیا خریدی گئیں جن میں سے بعض برآمد کر لی گئی ہیں۔

ملزمان کے موبائل فونز کا فرانزک تجزیہ کر کے آلات مزید جانچ کے لیے پنجاب فرانزک لیبارٹری بھیج دیے گئے ہیں۔ پولیس کے مطابق باقی تین ملزمان اور ان کے سہولت کاروں کی گرفتاری کے لیے کارروائیاں جاری ہیں۔ گرفتار ملزمان سے رابطہ ممکن نہ ہونے کی وجہ سے ان کا مؤقف حاصل نہیں کیا جا سکا۔