نوشکی میں فائرنگ، پولیو ٹیم کی سیکیورٹی پر مامور دو اہلکار ہلاک

بلوچستان کے ضلع نوشکی میں پولیس کے مطابق منگل کو پولیو ٹیم کی حفاظت پر مامور دو اہلکار مسلح حملے میں مارے گئے۔ حملہ آور فرار ہو گئے، اور علاقے میں سرچ آپریشن جاری ہے۔

نوشکی کے ایس پی سلیم شاہوانی نے انڈیپنڈنٹ اردو کو بتایا کہ دونوں اہلکار پولیو ٹیم کے ساتھ سیکیورٹی پر تھے کہ کلی جمال آباد میں مسلح موٹر سائیکل سوار نے فائرنگ کر دی۔ دونوں موقعے پر ہی دم توڑ گئے، جبکہ پولیو ٹیم محفوظ رہی۔ مقتول اہلکاروں کی شناخت عبدالرؤف مینگل اور یاسر کے نام سے ہوئی۔

انہوں نے بتایا کہ واقعے کے بعد علاقے کی ناکہ بندی کر کے حملہ آوروں کی تلاش شروع کر دی گئی ہے۔ پولیس ذرائع نے انڈیپنڈنٹ اردو کو بتایا کہ حملہ آور بھاگتے وقت دونوں اہلکاروں کا سرکاری اسلحہ بھی ساتھ لے گئے۔

وزیر داخلہ بلوچستان ضیاء لانگو نے واقعے کی رپورٹ آئی جی پولیس اور سیکرٹری داخلہ سے طلب کی ہے۔ ان کے دفتر سے جاری بیان میں کہا گیا کہ پولیو ورکرز کی حفاظت پر مامور پولیس اہلکاروں کو نشانہ بنانا بچوں کے محفوظ مستقبل پر حملہ ہے۔ بیان کے مطابق پولیو کے خلاف جنگ دراصل بلوچستان کے بچوں کو محفوظ اور صحت مند مستقبل دینے کی جنگ ہے۔ انہوں نے کہا کہ دہشت گرد عناصر بچوں کو بیماریوں سے بچانے کی کوششوں کو نقصان نہیں پہنچا سکتے۔

حملہ اس وقت ہوا جب بلوچستان میں پیر سے سات روزہ پولیو مہم جاری ہے، جس کے لیے 9 ہزار ٹیمیں تشکیل دی گئی ہیں۔ کوئٹہ سمیت تمام اضلاع میں پولیو ٹیموں کے لیے پولیس سیکیورٹی فراہم کی گئی ہے۔

بلوچستان میں ماضی میں بھی پولیو ٹیموں اور ان کی حفاظت پر مامور اہلکاروں پر حملے ہو چکے ہیں۔ ضلع نوشکی گزشتہ دو سال سے بدامنی کا شکار ہے اور یہاں کالعدم بلوچستان لبریشن فرنٹ سرگرم ہے۔ شہر میں متعدد بار حملے ہو چکے ہیں اور سیکیورٹی اداروں نے بعض اوقات کرفیو بھی نافذ کیا ہے۔