بلوچستان میں سونے کی اسمگلنگ ناکام، 6.162 کلوگرام سونا ضبط

بلوچستان کے سرحدی علاقوں کے ذریعے سونے کی اسمگلنگ کی ایک بڑی کوشش کو ناکام بناتے ہوئے کسٹمز انفورسمنٹ نے 6.162 کلوگرام سونا ضبط کر لیا ہے۔ ایکسپریس نیوز کے مطابق ضبط شدہ سونے کی ابتدائی مالیت تقریباً 25 کروڑ روپے بتائی گئی ہے۔

کارروائی 21 ستمبر 2026 کو شیلا باغ میں فیلڈ انفورسمنٹ یونٹ کے اہلکاروں نے فرنٹیئر کور (ایف سی) کے فعال تعاون اور معاونت سے انجام دی۔ خفیہ اطلاع کی بنیاد پر اور علاقے میں مؤثر نگرانی کے دوران کسٹمز انفورسمنٹ اہلکاروں نے اسمگلنگ کی کوشش کو بروقت ناکام بناتے ہوئے سونے کے بسکٹ برآمد کر لیے۔

پاکستان کسٹمز کے بیان میں کہا گیا کہ یہ کارروائی بلوچستان کی اہم شاہراہوں، فیلڈ انفورسمنٹ یونٹس، داخلی و خارجی راستوں اور اسمگلنگ کے حساس راستوں پر جاری انٹیلی جنس بنیاد پر مبنی اور مؤثر انسداد اسمگلنگ مہم کا حصہ ہے۔ بیان کے مطابق ایف ای یو شیلا باغ میں مؤثر نگرانی اور پاکستان کسٹمز اور فرنٹیئر کور کے درمیان قریبی رابطہ کاری کے باعث اسمگل شدہ سونے کی بروقت نشاندہی اور ضبطی ممکن ہوئی۔

حکام نے بتایا کہ ضبط شدہ سونا مقررہ قانونی طریقہ کار کے تحت اسٹیٹ ویئر ہاؤس کوئٹہ میں جمع کرا دیا گیا ہے، جبکہ ایف آئی آر بھی درج کر لی گئی ہے اور مزید قانونی کارروائی جاری ہے۔

بیان میں مزید کہا گیا کہ کلیکٹریٹ آف کسٹمز انفورسمنٹ کوئٹہ کی جانب سے سرحد پار اسمگلنگ کی روک تھام، قانونی تجارت کے تحفظ اور سرکاری محصولات کے تحفظ کے لیے اسمگلنگ میں ملوث عناصر کے خلاف مروجہ قانونی ضابطے کے مطابق سخت کارروائی عمل میں لائی جائے گی۔