کراچی ایئرپورٹ پر ویکسینیشن سینٹر کل سے 24 گھنٹے فعال

جناح انٹرنیشنل ایئرپورٹ پر بین الاقوامی مسافروں کے لیے قائم ویکسینیشن سینٹر 24 ستمبر سے چوبیس گھنٹے فعال رہے گا۔ بارڈر ہیلتھ سروسز کے مطابق یہ سینٹر ایئرپورٹ ہیلتھ قرنطینہ اسٹار گیٹ کے قریب سول ڈسپنسری میں بنایا گیا ہے۔

ایکسپریس نیوز نے حکام کے حوالے سے بتایا کہ بیرون ملک جانے والے پاکستانی پاسپورٹ رکھنے والے مسافروں کے لیے ویکسینیشن لازمی قرار دی گئی ہے۔ ویکسین کی ضرورت کا تعین مسافر کی منزل، ٹرانزٹ اور سفر کے شیڈول کے مطابق کیا جائے گا۔

میننجائٹس ویکسین کی فیس 2,785 روپے اور انفلوئنزا ویکسین کی فیس 1,720 روپے مقرر کی گئی ہے جبکہ پولیو ویکسین بین الاقوامی مسافروں کو مفت فراہم کی جائے گی۔

حکام کے مطابق انفلوئنزا ویکسین ایک سال کی عمر سے اور میننجائٹس ویکسین 12 سال کی عمر سے لگوائی جا سکتی ہے۔ پولیو ویکسین سال میں ایک بار لازمی ہوگی۔ حاملہ خواتین کو فی الحال صرف انفلوئنزا ویکسین دی جائے گی جبکہ دودھ پلانے والی مائیں تینوں ویکسین لگوا سکتی ہیں۔

اگر بائیومیٹرک تصدیق میں دشواری ہو تو مسافر کو مجاز عملے کے پاس بھیجا جائے گا اور ضرورت پڑنے پر دستی ویکسینیشن سرٹیفکیٹ جاری کیا جا سکتا ہے۔ نادرا، پاک آئی ڈی یا ای سہولت کی ادائیگی رسید 90 روز تک قابل استعمال ہوگی۔

بارڈر ہیلتھ سروسز نے واضح کیا ہے کہ غیر ملکی شہری ان ویکسینیشن تقاضوں سے مستثنیٰ ہیں۔ سعودی عرب جانے والے مسافروں کی ویکسینیشن تصدیق کے لیے ٹریول ایجنٹس کو فوری اقدامات کی ہدایت دی گئی ہے۔

ایئرلائنز، ٹریول ایجنٹس اور گراؤنڈ ہینڈلرز کو پابند بنایا گیا ہے کہ وہ مسافروں کو ویکسینیشن تقاضوں سے آگاہ کریں۔ جعلی یا مشکوک سرٹیفکیٹ قابل قبول نہیں ہوں گے اور خلاف ورزی کرنے والوں کے خلاف قانونی کارروائی کی جائے گی۔

حکام کے مطابق صحت کی تصدیق کے عمل میں مداخلت یا ہدایات کی خلاف ورزی پر 6 ماہ قید یا ایک لاکھ روپے تک جرمانہ ہو سکتا ہے۔ نئے انتظامات 10 اکتوبر صبح 10 بجے تک نافذ العمل رہیں گے۔