بچوں کی زیادتی کی ویڈیوز: این سی سی آئی اے نے دو ملزمان گرفتار کر لیے

قومی سائبر کرائم تحقیقاتی ایجنسی (این سی سی آئی اے) نے بچوں کے ساتھ جنسی زیادتی کی ویڈیوز بنانے اور پھیلانے کے الزام میں دو ملزمان کو گرفتار کر لیا ہے۔ یہ کارروائی امریکہ میں قائم چائلڈ پروٹیکشن ادارے این سی ایم ای سی کی جانب سے موصول ہونے والی اطلاع کے بعد کی گئی۔

پروپاکستانی کی رپورٹ کے مطابق ایک سوشل میڈیا پلیٹ فارم نے مشتبہ مواد کی نشاندہی کی اور امریکہ کے نیشنل سینٹر فار مسنگ اینڈ ایکسپلوئیٹڈ چلڈرن (این سی ایم ای سی) کو اطلاع دی، جس کے بعد یہ معلومات پاکستانی حکام تک پہنچیں۔

دی نیشن کے مطابق سکردو کے رہائشی ساجد علی کو 26 اکتوبر کو گرفتار کیا گیا۔ تفتیش کاروں کا کہنا ہے کہ ان کے موبائل فونز سے مشتبہ مواد برآمد ہوا، جس میں پاکستان میں بنائی گئی ویڈیوز کے ساتھ دوسرے ملکوں کا مواد بھی شامل ہے۔

پوچھ گچھ کے دوران ساجد علی کی فراہم کردہ معلومات پر 29 اکتوبر کو دوسرا ملزم گرفتار کیا گیا۔ حکام کے مطابق اس ملزم نے اپنے کم عمر بچے کے ساتھ جنسی زیادتی کی ویڈیو بنائی اور رقم کے عوض ساجد علی کو بھیجی۔ تفتیش کاروں کے مطابق ساجد علی نے ایک ویڈیو کے 7,000 روپے ادا کیے۔ دوسرے ملزم نے بتایا کہ یہ ویڈیو اس نے ساجد علی کی ہدایت پر بنائی۔

رپورٹ کے مطابق ساجد علی ٹیلی گرام گروپس میں سرگرم تھا جہاں ایسا مواد گردش کرتا ہے۔ حکام کا کہنا ہے کہ وہ گروپ ممبران سے رابطہ کرتا، مزید ویڈیوز رکھنے کا دعویٰ کرتا اور دوسروں کو بھی ایسا مواد شیئر کرنے کی ترغیب دیتا۔ اپنے مقصد کے بارے میں پوچھے جانے پر اس نے اسے ”ذہنی تسکین“ قرار دیا۔

پروپاکستانی کے مطابق برآمد شدہ مواد میں ایک سال تک کے بچوں کی ویڈیوز بھی شامل ہیں۔

یہ مقدمہ 26 اکتوبر کو اسلام آباد میں این سی سی آئی اے کے سائبر کرائم رپورٹنگ سینٹر میں سائبر کرائم قانون اور تعزیرات پاکستان کے تحت درج کیا گیا۔ تفتیش کاروں نے ملزمان کے بینک اسٹیٹمنٹس طلب کیے ہیں تاکہ ممکنہ مالی لین دین، بشمول بین الاقوامی ادائیگیوں، کی جانچ ہو سکے۔

اسلام آباد کی عدالت میں تفتیشی افسر سب انسپکٹر محمد وسیم خان نے مزید آٹھ روزہ جسمانی ریمانڈ کی استدعا کی تاکہ ملزمان کے الیکٹرانک آلات اور سوشل میڈیا اکاؤنٹس کی جانچ اور ممکنہ ساتھیوں کی شناخت ہو سکے۔ عدالت کو بتایا گیا کہ ساجد علی چھ دن اور دوسرا ملزم تین دن جسمانی ریمانڈ پر رہ چکا ہے۔

جوڈیشل مجسٹریٹ (ویسٹ) نے دونوں ملزمان کا چار چار دن مزید جسمانی ریمانڈ منظور کیا اور این سی سی آئی اے کو ہدایت کی کہ انہیں 6 نومبر کو دوبارہ پیش کیا جائے۔