سپریم کورٹ: زیر التوا مقدمات میں 47 فیصد کمی، اصلاحاتی رپورٹ جاری

سپریم کورٹ آف پاکستان نے عدالتی اور ادارہ جاتی اصلاحات سے متعلق رپورٹ جاری کر دی ہے جس میں نومبر 2024 سے ستمبر 2026 تک کی کارکردگی درج ہے۔ آج نیوز کے مطابق رپورٹ میں زیر التوا مقدمات کی تعداد میں 47 فیصد کمی اور مقدمات نمٹانے کی شرح میں 56 فیصد اضافے کا ریکارڈ درج ہے۔

رپورٹ میں 86 نکاتی ایکشن پلان کا ذکر ہے جس کے 64 اقدامات مکمل ہو چکے ہیں، 11 پر کام جاری ہے اور 11 پر مزید توجہ درکار ہے۔ سپریم کورٹ میں زیر التوا مقدمات 60,304 سے کم ہو کر 31,927 رہ گئے۔

آئینی ترمیم کے بعد 22,213 مقدمات وفاقی آئینی عدالت منتقل کیے گئے۔ نومبر 2024 سے ستمبر 2026 کے دوران عدالت نے نئے دائر ہونے والے مقدمات کے مقابلے میں 6,998 زیادہ فیصلے کیے۔ عدالتی سال 2024-25 میں 25,989 مقدمات نمٹائے گئے جبکہ گزشتہ سال یہ تعداد 16,620 تھی۔

تیز سماعتوں کی وجہ سے طویل عرصے سے زیر التوا مقدمات آگے بڑھے۔ سزائے موت کی اپیلیں اب 2015 کے زیر التوا مقدمات سے آگے بڑھ کر 2026 تک پہنچ چکی ہیں، ضمانت بعد از گرفتاری کے مقدمات 2009 سے بڑھ کر 2026 اور خاندانی مقدمات 2010 سے بڑھ کر 2026 تک آ گئے۔

سپریم کورٹ رولز 2025 کے تحت ای فائلنگ، ڈیجیٹل ریکارڈ اور ورچوئل سماعتوں کا قانونی فریم ورک نافذ کیا گیا۔ 45,131 سے زیادہ مقدمات ای فائلنگ کے ذریعے دائر ہوئے، 2 لاکھ 64 ہزار سے زیادہ فیصلے ڈیجیٹل کیے گئے اور سائلین کو 34,883 سے زیادہ مصدقہ نقول جاری کی گئیں۔

سپریم کورٹ میں عوامی سہولت مرکز قائم کیا گیا، مفت قانونی مشورے کے لیے کال سینٹر متعارف کرایا گیا اور بیرون ملک مقیم پاکستانیوں کے لیے اوورسیز لٹیگنٹس فیسیلیٹیشن سیل فعال کیا گیا۔

رپورٹ میں ماتحت عدلیہ کا بھی احاطہ کیا گیا۔ ضلعی عدالتوں نے 14 لاکھ 67 ہزار 675 ٹائم باؤنڈ مقدمات کے فیصلے سنائے جن میں ماڈل کرمنل کورٹس کے 91,071 اور ماڈل سول کورٹس کے 42,386 مقدمات شامل ہیں۔ 17 ترجیحی اقسام کے مقدمات کے لیے دو سے 24 ماہ کے اہداف مقرر کیے گئے۔

398 مقامات پر ویمن فیسیلیٹیشن سینٹرز قائم کیے گئے ہیں جن میں انتظار گاہیں، بچوں کی دیکھ بھال اور علیحدہ واش رومز کی سہولتیں ہیں۔ عدالتی عملے کی شکایات کے لیے اینٹی کرپشن ہاٹ لائن قائم کی گئی اور ایکسیس ٹو جسٹس ڈویلپمنٹ فنڈ سے عدالتوں میں شمسی توانائی، ای لائبریریوں اور صاف پانی کے منصوبے چلائے جا رہے ہیں۔

رپورٹ کے اختتام پر کہا گیا ہے کہ اصلاحات کا مقصد شہریوں کو بروقت انصاف، آسان طریقہ کار اور بہتر سہولتیں فراہم کرنا ہے۔