پٹرول کی قیمتوں کا نیا فارمولا، ریفائنریوں کا 6 ارب ڈالر کے منصوبے پر خطرے کا انتباہ

پاکستان کی آئل ریفائنریوں نے اتوار کو خبردار کیا ہے کہ حکومت کی جانب سے پٹرول کی قیمتوں کے تعین کے قواعد میں حالیہ تبدیلی چھ ارب ڈالر کے جدیدکاری پروگرام کو خطرے میں ڈال رہی ہے اور اس فیصلے سے ریفائنریوں کے لیے اپنا کام جاری رکھنا مالی طور پر ناقابل عمل ہو سکتا ہے۔

وزارت پیٹرولیم نے جمعے کو جاری ہدایت نامے میں ریفائنریوں کو کہا کہ وہ 7 مارچ کے معیار پر بننے والے فارمولے کے تحت قیمتوں کا فرق حکومت کے حوالے کریں۔ صنعتی حلقوں کا اندازہ ہے کہ اس سے مقامی طور پر تیار ہونے والے پٹرول پر فی لیٹر 49 روپے تک کا اضافی بوجھ پڑے گا۔

انڈپینڈنٹ اردو کے مطابق ہدایت نامے کی ایک نقل عرب نیوز نے دیکھی ہے، جس میں چھ ریفائنریوں کے نام ہیں: پاک عرب ریفائنری لمیٹڈ (پارکو)، پاکستان ریفائنری لمیٹڈ (پی آر ایل)، اٹک ریفائنری لمیٹڈ (اے آر ایل)، نیشنل ریفائنری لمیٹڈ (این آر ایل)، سنرجیکو پی کے اور اینار۔

اس اقدام کا مقصد امریکہ اور ایران کی جنگ کے باعث عالمی توانائی منڈیوں میں پیدا ہونے والی بے ترتیبی کے نتیجے میں بڑھتی ہوئی قیمتوں سے صارفین کو تحفظ فراہم کرنا ہے۔ صارفین کے لیے پٹرول کی قیمت پاکستان سٹیٹ آئل کی حالیہ درآمدات کی اصل لاگت کے مطابق مقرر ہوگی، مگر ریفائنریوں کو اپنی فروخت کی قیمت 7 مارچ کو نافذ پریمیم، اضافی اخراجات اور کسٹم ڈیوٹی کی شرحوں کی بنیاد پر شمار کرنی ہوگی۔ قیمتوں میں کوئی بھی مثبت فرق پیٹرولیم لیوی کے ذریعے حکومت کو دینا ہوگا، یعنی اس کا مالی بوجھ ریفائنریاں خود اٹھائیں گی۔

صنعتی عہدے داروں کا تخمینہ ہے کہ بنیادی قیمتوں میں ردوبدل سے ریفائنریوں کو فی لیٹر تقریباً 35 روپے اور کسٹمز ڈیوٹی کی رقوم دوسری طرف منتقل ہونے سے مزید 14 روپے کا نقصان ہوگا۔

اٹک ریفائنری لمیٹڈ کے چیف ایگزیکٹیو عادل خٹک نے عرب نیوز سے کہا کہ یہ فیصلہ اس سے زیادہ نامناسب وقت پر نہیں کیا جا سکتا تھا۔ ان کے مطابق ریفائنریاں جدیدکاری کے منصوبوں کے لیے مقامی اور بین الاقوامی مالیاتی اداروں سے خطیر رقم حاصل کرنے کے لیے وسیع مذاکرات کر رہی ہیں۔

چار ریفائنریوں نے برسوں کی پالیسی تاخیر کے بعد 24 ستمبر کو اپ گریڈیشن کے معاہدوں پر دستخط کیے تھے، تاہم پارکو نے اب تک دستخط نہیں کیے۔

خٹک نے کہا کہ ماضی میں ضابطہ جاتی تاخیر کے باعث قومی معیشت کو سالانہ تقریباً ڈیڑھ ارب ڈالر کا نقصان اٹھانا پڑا۔ انہوں نے کہا کہ براؤن فیلڈ ریفائنریز اپ گریڈیشن پالیسی کے تحت 10 فیصد کسٹمز ڈیوٹی کی رقم ریفائنریوں کے مخصوص اکاؤنٹس میں جمع کرانا لازم ہے تاکہ جدیدکاری کے اخراجات کا کچھ حصہ پورا ہو، اور اس رقم کو دوسرے مقاصد کے لیے منتقل کرنا اس شق کا بنیادی مقصد ہی ختم کر دیتا ہے۔

ریفائننگ سیکٹر کے عہدے داروں نے کہا کہ کمپنیاں قیمتوں میں استحکام کے لیے ہائی سپیڈ ڈیزل کے ریفائننگ منافع کی حد دو مرتبہ مقرر کرنے پر رضامند ہو چکی ہیں، پہلے یہ حد 41.89 ڈالر اور بعد ازاں 38 ڈالر فی بیرل تھی۔

پیٹرولیم ڈویژن اور وزیر پیٹرولیم علی پرویز ملک نے تبصرے کی درخواست کا جواب نہیں دیا۔ حکام اس سے پہلے قیمتوں میں حکومتی مداخلت کا دفاع کرتے ہوئے اسے منافع خوری روکنے اور عالمی قیمتوں میں اچانک اضافے سے صارفین کو بچانے کے لیے ضروری قرار دے چکے ہیں۔

سنرجیکو پی کے لمیٹڈ کے وائس چیئرمین اسامہ قریشی نے کہا کہ اگر ان فیصلوں پر نظرثانی نہ کی گئی تو ریفائنریاں بالآخر پیداوار محدود کرنے یا بند کرنے پر مجبور ہو سکتی ہیں، جس سے پاکستان کا درآمدی پیٹرولیم مصنوعات پر انحصار مزید بڑھ جائے گا۔ انہوں نے سعودی عرب، قطر اور امریکہ سے سرمایہ کاری لانے کی کوششوں اور ایسے ملکی ضابطہ جاتی اقدامات کے درمیان تضاد کی نشاندہی کی جو سرمایہ کاروں کے اعتماد کو ٹھیس پہنچاتے ہیں۔

نیشنل ریفائنری لمیٹڈ کے چیف ایگزیکٹیو اسد حسن نے کہا کہ حکومت کی عوام کے لیے قیمتیں کم رکھنے کی خواہش قابل فہم ہے اور صنعت اس کی قدر بھی کرتی ہے اور حمایت بھی۔ انہوں نے کہا کہ ڈیزل کے منافع کی حد مقرر کرنے پر رضامندی ظاہر کر کے ریفائنریاں 100 ارب روپے (361 ملین ڈالر) سے زیادہ کا حصہ ڈال چکی ہیں۔

اسد حسن نے کہا کہ یہ حیران کن ہے کہ حکومت چاہتی ہے ریفائنریاں جنگ کے بعد کے پریمیم پر خام تیل خریدیں لیکن موٹر اسپرٹ یعنی پٹرول جنگ سے پہلے کی قیمت پر فروخت کریں۔